Isaka'n semifinal-ah Odisha a hruai thleng
Mizo tlangval Isak Vanlal-ruatfela'n minute 98-naah Odisha chakna goal a khung a, an club chanchina a vawi khat nan Odisha chu Indian Super League semifinal a hruai thleng.
Zirtawpni zan khan ISL playoff-ah Odisha-in Kerala Blasters an mikhual a, Kerala club-in Fedor Cernych hmangin goal hmahruai khung mah se, Odisha hian hun tawp dawna Diego Mauricio goal hmangin si phurh an sut a, extra time-ah Isaka'n chakna goal a khung zui.
Inrinni zan khan playoff inkhel dangah FC Goa chuan 2-1 in Chennaiyin an hneh a, goal thum hi first half chhunga lut vek a ni. Goan club hian Noah Sadaoui leh Brandon Fernandes hmangin vawi hnih ngawt hma an hruai a, South Indian club tana Lazar Cirkovic goal khungin awmzia a nei phak lo.
Thawhlehni zanah ISL semifinal match hmasa zawk khelh a ni dawn a, Odisha leh Mohun Bagan an intawng ang - Nilaini zanah semifinal match hnihna khelh niin, FC Goa leh Mumbai City an intawng dawn thung a, semifinal hi double leg-a khelh tur a ni.
Inkhel hmuhnawm
Odisha khelmualah mualneitu team tana bul ṭan zingah Mizo pali ngawt an awm - defender Jerry Lalrinzuala, midfielder K. Lalṭhathanga, forward Jerry Mawihmingthanga leh Isaka te an ni a, Blasters lamah midfielder Freddy Lallawmawma chuan inkhel bul a ṭan bawk.
ISL inkhel pawimawhah Mizo panga ngawtin bul an ṭan a, a ropui hle. Mizoram player-te hi Blasters lakah pawh an langsar a, Jerry, Puitea, Jerry Mawia leh Isaka ten goal khungna chance an nei vek a, goal hmaa vannei thei erawh an awm lawk lo.
Goal lut loa chawlhlawk hman a nih hnuah, Blasters lamin goal an khung hmasa zawk a, Mohammed Aimen chuan Fedor Cernych tan ṭha zeta siamsakin, Lithuanian striker hian harsatna nei loin goal-ah a chantir.
Blasters fans an lam a, mahse, coach leh player nei ṭha Odisha an beidawng duh lo. Hun tawp nan minute thum chauh a awm tawh tihah Diego Mauricio chu inlarin, si phurh sutna goal a khung a, 1-1 a ni.
A hunah Isaka
Extra time khelh zui a ni a, Mizo tlangval Isaka a inlar. Bawngkawn/Thingsulthliah tlangval hian minute 98-naah Krishna siamsak bawk chu hnai set sawt aṭangin goal-ah a chantir a, tun season ISL-a goal li a khungna chiah niin, assist vawi thum a nei bawk - Odisha-in semifinal an lut zui.
Season duhawm tak hmangtu Isaka chuan, "Ka goal khung tawh zawng zawngah ka lawm ber a la ni hial ang. Tlarhmaa khel nih chuan goal thun hi chu kan châk reng ṭhin a, goal khung reng erawh a harsa em em lawi si. Mahse, tun ṭum chu goal khung kha ka inbeisei tlat a, 1-1 a nih phei kha chuan chakna goal khung ngei kha ka tumruh hle," tiin Vanglaini a hrilh.
Isaka chuan sawi zawmin, "Pathian hnenah lawmthu ka sawi a ni. Tun thlenga harsatna nei loa season ka hmang thei hi ka lawm a, footballer nih chuan inhliam thei reng kan nih laia min veng tlat ṭhin hi a ropui ka ti a, goal ka thunah lawm tho mah ila, chu zawng ai chuan Pathian min venna hi ka ngaihlu zawk a ni," a ti.
Aizawl FC forward hlui Isaka chuan an semifinal khelh tur thlirlawkin, "A la tawp lo a, hmabak kan la nei. Ka khelhpui leh coaching staff te pawh an ṭang em em vek a, semifinal hmachhawn turin theihtawp chhuahin kan inbuatsaih dawn," a ti a, ISL nomawi a thlir.
Bye bye Chennai!
ISL-a an league match tawp berah FC Goa-in 4-1 in Chennaiyin an sawp a, inkhelh zawhah Chennai club coach Owen Coyle chuan, "He hmunah hian kan kir leh a nih chuan, inpeih takin kan lo kir ang," tiin a sawi a, semifinal-ah FC Goa nen intawng ta ngei mah se, thu chu a tak ram an chantir thei lo.
Inrinni zan inkhelah hian Goa tan Noah Sadaoui chuan minute 36-naah goal hmahruai a khung a, Morocco tana vawi li inlan tawh forward goal khung hi goal 'class' bik tih loh rual a ni lo a, Chennai club an hawihai.
FC Goa-in an la duhtawk lo cheu. Minute 45-naah an fapa rangkachak Brandon Fernandes a inlar a, India international hian penalty box pawn aṭangin mawi lutukin a khung a, 2-0 a ni der.
Chennaiyin tan first half hun pek belh minute linaah Lazar Cirkovic chuan si phurh rawn sut ṭhen ve nghal mah se, mikhual team hian goal dang an nei thei tawh lo a, Goa-in 2-1 a hnehna changin semifinal an lut.