A chung berah Arsenal an kir!
Arsenal ṭantuten season hmasa chawhnu lama an tluksawpna ang kha an tawng leh mai ang tih an hlau a, hlauthawng leh thaw dep depa an awm laiin an mikhualna ramah Wolverhampton Wanderers chu 2-0 in an hneh.
Mikel Arteta naute hi an chak avangin Premier League hmahruaitu an ni leh rih, match khata khel tam zawk chungin Manchester City aiin point khatin an sang zawk - Citizens hian FA Cup an khelh avangin kar tawp league match an khel lo.
Laipui a puak ta
Aston Villa lakah goal an khung thei lo a, league hmahruaitu an nihna an hloh - Bayern Munich lakah goal an khung theih loh avangin Champions League quarterfinal aṭangin an tla bawk, kumin tir lama goal khung thei tak Arsenal tlarhma a bil tlat.
Wolves mualah pawh a tir lamah chuan an buai leh mai dawn ni pawhin a lang hman. Mahse, chawlhlawk hma chiahin Leandro Trossard-a'n box chhunga ball per dawng fuhin laklawh nei miah loin goal kilah a pet thut a, chiang zetin a goal.
Mikhual Gunners hian second half pawh an thunun, amaherawhchu first half ang thoin goal nei leh turin an nghah rei a ngai hle. Hun tawp dawnah captain Martin Odegaard chuan a khung, a ball cross an lo dansak per chu chang lehin angle zim zet aṭangin a pet lut.
Wolves tan Joao Gomes pawhin hun ṭha bik a nei, box chhung sir lam aṭanga a shot ṭha tak mai chu goalkeeper David Raya chuan a lo dang per hman a, ball per hian a ban a per zui a, goal chhung lamah kal loin a pawn lamah a chhuak.
A naute faktu
Arsenal manager Mikel Arteta hian a player-te a sawisel ngai lo, an chak loh leh chet fuh loh lai pawhin a chhan tlat ṭhin. Tun hnaiah che fuh tawk lo mah se Wolves laka an insiamṭha ta chu lawmawm a ti a, ṭha taka khelh chhunzawm theih a inring.
Arteta chuan, "Munich-ah khan haw nghal loin kan riak a, darkar hnih vel mut hahchawlhna hun kan nei. North London kan thlen aṭanga darkar 48 hnuah match kan khelh leh nghal a ngai, a nihna takah chuan a awlsam lo hle.
"Bayern nen kan inkhelh zawh khan lungngaia awmna hun a awm lo, kan hmabak Wolves chauh kha ka ngaihtuah lui tlat a ni," a ti. Spanish manager hian player mai bakah coaching staff ten hna an thawh ṭhat tawk thu a sawi bawk.
Gunners hian Thawhlehni zanlaiah Chelsea an mikhual zui leh nghal dawn. Blues hi Manchester City hneh loa FA Cup semifinal aṭanga tla hlim an ni. London club pahnihten hahchawlhna hun nei tlem tak chunga Derby an khelh zui a ngai dawn tihna a ni.