Hamilton-a'n season khar theih a beisei

Covid-19 a kai avangin Lewis Hamilton chuan Sakhir Grand Prix a hmachhawn thei lo a, tun season chhunga intlansiak hnuhnung ber tur Bahrain Grand Prix-ah erawh inlan theih a beisei.

Mercedes driver hian a vawi sarih nan F1 nomawi a chawi fel leh tawh, a nomawi a humhim hnuah hrileng kaiin khung hran a ni. Natna a nei hran lo a, hri lakah a fihlim a nih chuan car intlansiak a hmachhawn leh theih mai a rinawm.

Hamilton chuan, "Chawlhkar ka hman tawh zinga harsa leh hrehawm pawl tak a ni. Ka dam chho leh mek tawh a, tunah chuan a rang thei ang bera intlansiak leh thei turin hmalam ka pan zel.

"Dam leh thuai tura duhsakna ka dawng hnem a, inchungah ka lawm takzet. Tuna a lan dan chuan season kharna intlansiakah ka inlan theih ngei ka beisei," tiin beisei a neih san thu a sawi.

Hri a kai tawh lo a nih chuan Hamilton hian inelna hmachhawn ngei a tum chiang a, chutihrualin an intlansiakna tur ram United Arab Emirates sorkar thuneitu lam aṭangin phalna a neih a ngai bawk ang.