East Bengal lakah Home Missions chak lo

Reliance Foundation Development League national group stage-ah Mizoram aiawh Home Missions FC chuan April 20, Inrinni tlai khan East Bengal 2-0 in an hneh lo.

Kolkata club ṭha East Bengal hi match thum an khelh tawhah an la chak vek. Inelnaah hian a sang ber chauhin semifinal an luh dawn bakah head to head en tur a nih avangin Home Missions tan beisei tur a awm tawh lo.

Delhi University Ground-ah Rochhingpuia kaihhruai Home Missions an khel chhe lo a, East Bengal nen an inkhel tawk hle. Mahse, assistant referee thutlukna siam sual avangin East Bengal-in minute 64-naah throw in an hmu a, hei hi hmang ṭangkaiin goal-ah an chantir. Minute ruk hnuah East Bengal-in freekick aṭangin an khung leh a, 2-0 in inkhel a tawp.

Home Missions hian April 23, Thawhlehniah Adamas United an hmachhawn ang a; April 26, Zirtawpniah NorthEast United nen an inkhel leh ang. Mizoram aiawh team Home Missions-in semifinal thleng zo lo mah se inelna ṭha an hmachhawn avangin player-ten hmasawnna an neih belh ang.