Vanglai hmangtu Max Verstappen

Formula 1 champion lai Max Verstappen-a'n amah um phaktu a nei lo - nimin F1 Chinese Grand Prix intlansiakah Red Bull driver hian hnehna a chang a, tun season championship hmahruaitu a nihna a sawhnghet.

Dutch tlangval hian season a hmang ṭha leh hle a, ṭum khat a tlan tluan theih loh bak chu hnehna a la chang vek, a chak loh ṭum hian Ferrari car khalhtu Carlos Sainz a chak thung a, midang tan hmun an la kian miah lo.

Safety car vawi hnih a tlan luhna Chinese GP-ah hian Max tan hna harsa lutuk a awm hran lo, a hnungah hian McLaren driver Lando Norris thlengin pathumna chu Red Bull car khalhtu pakhat zawk Sergio Perez a ni thung.

Mercedes an la chefuh tawk lo tluang zel, a bik takin world champion vawi sarih ni tawh Lewis Hamilton chu pakuana a ni a, Britain tlangval hi driver championship table-ah pakuana tho a nih avangin a vawi riat nana champion a beiseina chu a hlawhtlin a rinawm loh.

Car intlansiakna sang ber hi May 5, Pathianni zan hian tlan leh a ni dawn; Miami International Autodrome-ah Miami Grand Prix an tlan ang.