Cardiff lakah Saints an chesual

Season thara Premier League khelh tum inum boruak a sang zel - Inrinni zan khan Southampton chuan khualmualah 2-1 in Cardiff City an ngam lo a, automatic promotion hmuh an beiseina chu chance a chhe leh ta sawt.

Saints hian minute 12-na lekah Joe Aribo hmangin goal hmahruai khung mah se, minute 68-naah Famara Diédhiou chuan Cardiff tan si phurh sutna goal a khung a, Cian Ashford chuan hun pek belhah chakna goal a khung zui.

Inrinni zan inkhel dangah Southampton chak loh hmain Leicester City chuan 2-1 in West Brom an hneh a, Wilfred Ndidi leh Jamie Vardy ten goal khat ve ve khungin, Baggies tana Jed Wallace goal khungin awmzia a nei phak lo - Foxes hian table chung ber an luah chhunzawm.

Championship-ah match thum chiah khelh tur awm tawhin, Foxes-in point 91 an nei a, table chung berah an awm - an hnuai chiaha awm Ipswich Town aia an sanna chu point hnih chiah a ni a, Leeds United leh Southampton ten automatic promotion hmua season khar theih hram an la inbeisei ve reng bawk a, chance erawh a tam tawh lo.

English second division-a pakhatna leh pahnihna te hian automatic promotion hmangin season tharah Premier League an khel ṭhin a, pathumna aṭanga paruknaten playoff hmangin hmun ruak pakhat an inchuh ve leh ṭhin bawk.

Hetihlai hian Premier League club hlun ni ṭhin Stoke City chu League One-a tla thei dinhmun aṭangin an insiamrem ve zel a, Inrinni zan khan Plymouth Argyle chu 3-0 in an hneh - Ki-Jana Hoever, Million Manhoef leh Wouter Burger ten goal khat ṭheuh an khung a, Plymouth-in a chhanletna tur an nei lo.

Stoke hian point rukin relegation zone-a awm chin Huddersfield Town an tlansan a, Huddersfield hi Swansea City chuan Inrinni zan khan 4-0 in an sawp - Jamal Lowe, Ronald, Jerry Yates leh Liam Walsh ten goal khat ṭheuh an khung.