European football khel tur Girona

Tun season La Liga-a an match hmasa 23-a vawi khat chiah tlawm Girona chu tun hnaiah an talbuai a, an league match hnuhnung pakuaah vawi thum chiah chakin, vawi li an tlawm a, vawi khat an khingpui an inhnehtawkpui. Mahse, Inrinni zan khan Cadiz lakah 4-1 a chakin an insiamṭha ve leh ta a, season tharah European football an khel dawn chiang.

Girona tan Eric García, Iván Martín, Artem Dovbyk leh Portu ten goal khat ṭheuh an khung a, mikhual Cadiz tan Gonzalo Escalante chuan goal khat khung ve bawk mah se, goal a khung meuh hi chuan si li an phur tawh a, Cadiz tan thawhleh ngaihna a awm tawh lo a, an tlawm.

Beisei phak baka season hmang ṭha Girona hian table-ah pathumna niin an dinhmun an sawh nghet a, palina Atletico Madrid aiin point sarihin an sang mek - nizan khan Atletico hi an inlan ve chiah a, an chak chuan Girona nena an inthlauhna hi point liah a tla leh dawn a, an result erawh kan hre hman lo.

Girona-in league match ruk khelh tur la nei mah se, pasarihna aia hniamah season an khar thei tawh lo a, hei vang hian a hniam berah Europa Conference League chu an khel dawn - an club chanchina European football an khelh hmasak ber tur a ni dawn a ni.

Hetihlai hian season chawhnu lama insiamṭha, tun hnaia European football khelh hial beiseina nei hman Valencia-in an elpui Real Betis khelmualah hnehna an chang zo lo a, 2-1 a an tlawm avangin pasarihna an nih theihna chance chu bawhpelhin, table-ah pariatna an ni mek.

Betis tan Ayoze Pérez chuan minute 19-naah goal hmahruai khungin, Valencia hian minute 66-naa Pepelu-a penalty hmangin an chhang. Mahse, Leicester City aṭanga Betis pantu Perez hian goal khat dang khung lehin, a team hi 2-1 in hnehna a chanpui a ni.

Nizan khan El Clasico khelh niin, Real Madrid khelmualah Barcelona an leng a, he thu buatsaih a nih lai hian an result kan hre hman lo.