Burnley beiseina a la thi lo

Vincent Kompany hoa Premier League inhamtan tum Burnley-in beiseina thar an nei a, Inrinni zan khan table mawngphah luahtu Sheffield United chu 4-1 ngawtin an sawp.

Burnley tan hian Jacob Bruun Larsen, Lorenz Assignon, Lyle Foster leh Jóhann Gudmundsson ten goal khat ṭheuh an khung a, Sheffield tana Gustavo Hamer goal khung chu mualpho zualpui khuhna chauh a ni.

Tlak hlau Burnley lawmna belhchhah turin an chung chiaha awm Luton Town chu Brentford-in 5-1 in an sawp a, mikhual Brentford tan Yoane Wissa chuan goal hnih khungin, Ethan Pinnock, Keane Lewis-Potter leh Kevin Schade ten goal khat ve ve an khung.

Luton tan hun pek belhah Luke Berry chuan goal khat a khung ve leh a, an goal khung a tlai hret avangin beiseina thar siam nan hun a awm tawh lo.

Burnley-in table-ah 19-na dinhmun luahin, a him china awm Nottingham Forest an phak lohna chu point thum a ni a, match khatin an khel tam thung - nizana inlan Forest result a zirin an inthlauhna hi a dang leh thei ang.

Luton chu 18-naah an awm mek a, Burnley aiin point hnihin an hmu hnem zawk - Premier League hmawr bawk a hnai a, champion inum boruak tluk zetin tlak hlau inel boruak pawh a sang.