Bayern-in Union Berlin an sawp

Bundesliga-ah champion tur a chiang tawh a, Bayern Munich-in Bayer Leverkusen lakah nomawi an chân tawh. Thomas Tuchel-a hoten beisei tur nei tawh lo mah se an zahawmna humhim nan Union Berlin lakah 5-1 in hnehna an chang.

Bayern tan Thomas Muller-a'n goal hnih a khung bakah Leon Goretzka, Harry Kane leh Mathys Tel ten goal khat ṭheuh an khung. Alte Forsterei-a inkhelah mualneitu Union Berlin-in goal nga an chhuah hnuah Yorbe Vertessen-a'n minute 90-naah goal khat a khung ve hram.

Bavarians hian match 30 aṭangin point 66 an hmu a, an khelh hmabak match lia an chak vek chuan point 78 an hmu dawn. Season liam ta khan Bayern hian point 71 chauh hmuin an champion a, 2021-22 season-ah point 77, 2020-21 season-ah point 78 an hmu bawk. Tuchel-a hote hian season an hmang ṭha tawk lo tih a chiang a, chutihrualin nomawi an chân chhan tak erawh Xabi Alonso kaihhruai Bayer Leverkusen an che ṭha ve hrim hrim a ni.