Napoli tan European football a hla

Serie A champion lai ni mah se Napoli tan kawng a awlsam lo a, an nomawi an hloh dawn bakah Champions League khelh beiseina a thamral tluk a ni tawh - European football hrim hrim pawh an hlat mek zel.

Inrinni zan Serie A inkhelah Napoli hi Empoli chuan 1-0 in an lo hneh, goal awmchhun hi striker Alberto Cerri khung a ni a, mikhual team lamin a chhanletna tur an nei lo.

Serie A hian season thar UCL-ah team panga an tirh theih a rinawm, mahse tun dinhmunah Napoli hi pariatna an ni mek - an match hnuhnung panga aṭangin point nga chauh an hmuh avangin insiamṭhat an mamawh takzet.

Napoli coach Francesco Calzona chuan, "Zep tur a awm lo, tun season zet chu Napoli hian harsatna kan nei. Engkim mai hi mite hriata sawi chhuah vek erawh a remchang lem lo, ni thum dan lek leka match khelh tur tam lutuk hi kan tuar," a ti.

Season thara European football chungchang sawiin Calzona chuan, "Tun ang zela kan khel a nih chuan kan tan tlin phak a harsa ang, ngaihtuah ngam chi pawh a ni rih lo. Chutihrualin, kan hmabakah hian Napoli jersey hatu kan nihna anga kan khelh a ngai," tiin a sawi.

Inrinni zan inkhel dangah Juventus pawh Cagliari nen 2-2 in an inhnehtawk a, Old Lady tan league nomawi beiseina a thamral. Nizan khan hmahruaitu Inter Milan chuan AC Milan an hmachhawn a, an chak a nih chuan an champion thei ang.