Lazio an tlang ve ta

Italian club Lazio chuan kum 20 zet hnuah Champions League last 16 an lut ve leh ta. Point 10 hmuin group F-ah pahnihna dinhmun an luah, an chungah hian Borussia Dortmund an awm.

Thawhlehni zan Stadio Olimpico a inkhelah Lazio leh an mikhual Club Brugge te hi 2-2 in an inhnehtawk. Italian club an tlang laiin chak lo Belgian club erawh Europa League lamah an inlan chhunzawm a ngai dawn.

Lazio tan Joaquin Correa leh Ciro Immobile ten goal an khung a, mikhual team lam tan Ruud Vormer leh Hans Vanaken ten an khung thung. Italian forward Immobile-a'n tun season UCL bikah goal nga a khung tawh.

Team pahnih tan hian Liverpool goalkeeper hlui pahnih an inlan. Lazio lamin siban nghaktu atan Pepe Reina an hmang a, Spanish player ang bawka Premier League khel tawh Simon Mignolet chuan Brugge tan goal a veng ve thung.

Kum 30 mi Immobile chuan, „Hun rei tak chhung Champions League kan khel lo a, a bik takin last 16 kan luh lona a rei tawh hle. Kan theihna zawng zawng sengin tun dinhmun hu kan thleng leh ta a ni a, kan hnathawh hi a chhuanawm hle in ka hria.

"Tunah chuan kan hmachhawn leh tur team kan ngaichang mek a ni a, team khauh leh harsa bik kan tum loh hram ka beisei," a ti. Champion lai Bayern Munich leh Liverpool te chu a hmachhawn chak loh an nih thu a sawi bawk.