Champions League aṭangin Man United an tla

Manchester United-in season hman mekah hliampui an tuar a, Thawhlehni zan khan RB Leipzig hneh loin Champions League aṭangin an tla. English club-in Europe inelna sang ber khel tawh loin Europa League an khel tawh dawn a, Ole Gunnar Solskjaer ban duhtu an pung.

Red Bull Arena-ah RB Leipzig-in VAR hmanga an goal khung pawmsak an ni lo chungin Manchester United lakah 3-0 in hma an hruai hman a, draw chiah mamawh Solskjaer-a hoten hun tawp lama goal hnih an khung zarah scoreline lang mawiin 3-2 in inkhel a tawp.

Solskjaer-a'n a player thlan danah goal venhim a tum tih a lang a, draw chiah an mamawh tih a hriat. Goalkeeper-ah David de Gea a inlan a, inhliam dam hlim Luke Shaw chu defence laia Harry Maguire leh Victor Lindelof te nena inthlawp turin dah a ni.

Mual sir lamah Aaron Wan-Bissaka leh Alex Telles te an awm a, defence pangaah hian a la tawp lo. Tlarhnung pui tur hian Nemanja Matic leh Scott Mc Tominay te an la awm cheu.

Norwegian manager-in a player-te a rem danah tlarhnung a thuah a tih theih a, tlarhmaah chuan Bruno Fernandes, Mason Greenwood leh Marcus Rashford te chiah an awm. 

United squad-a ball pass thiam Paul Pogba, Donny Van de Beek leh Juan Mata te chu bench-ah dah an ni a, forward pahnih Anthony Martial leh Edinson Cavani te chu hliam vangin an khel thei lo.

Solskjaer-a ruahmanna hi a thu phung chuan ṭha viau mah se manager thluak ṭha Julian Nagelsmann hmaah belhchian a dawl lo hle. United-in player an nei ṭha zawk a, RB Leipzig-in an defender ṭha ber Dayot Upamecano an chhawr thei lo tih hriat a ṭha bawk.

Minute hnihna lekah Marcel Sabitzer ball vawrh chu vengtu nei lo Angelino chuan goal hmahruai khung nan a hmang. Manchester City-a khelhna hmun chang lo Angelino siamsak chu Amadou Haidara-a'n minute 13-naah a khung leh bawk.

Minute 29-naah Ibrahima Konate ball tauh chuan goal ban a per a, goal ngat se chuan sawisel bo a ni ang. Amaherawhchu goal line hrulah kalin Willi Orban-a'n goal-ah a chantir a, VAR hmanga en let hnuah offside a nih tak avangin pawm a ni lo.

Second half-ah Leipzig bawkin goal an khung hmasa a, minute 69-naah Angelino cross chu Harry Maguire-a'n en liamin subsititute Justin Kluivert-a'n awlsam takin a khung. Inkhelh ṭan hmaa dinhmun ṭha lo zawka ngaih Leipzig-in goal thumin hma an hruai a, Germany-ah Man United an mualpho.

Man United hi Premier League-ah Southampton leh West Ham lakah an comeback a, goal thum an chhuah hnuah an goal nawr a na ve chauh. Greenwood leh Fernandes ten keeper Peter Gulacsi tan hna an siam a, chutihrualin second half-a Van de Beek leh Pogba te luh hnuah passing a mumal ta deuh bawk.

Rawlthar duhawm Greenwood-a'n Leipzig defender Konate lakah penalty a hlawh chhuak a, Fernandes-a'n minute 80-naah goal-ah a chantir. Minute hnih hnuah Pogba ball tauh chu buai nuaih karah Ibrahima Konate-a'n an lamah ti lut a, second 135 chhunga goal hnih vangin United-in beiseina thar an neih phah.

United-in goal khat chiah mamawh mah se ball chan an harsat a, hun tawp lamah erawh an vannei teuh hle. Injury time-ah Pogba cross chu Nordi Mukiele-a'n keeper Gulacsi keah a pet per a, Leipzig vannei ta zawkin 3-2 in hnehna an chang.

Solskjaer-a hoten ngaihtuahna thar an sen a ṭul, 'comeback' a ṭul chuan an khelh ṭhat loh vang a ni. Match tin maia 'comeback' a ngaih chuan an ṭhat tawk loh vang a ni a, vanneihnain a daih seng lo. Germany-ah United-in an phu tawk result an hmu.

A tawp lamah a hlauhthawnawm khawp mai. Amaherawhchu hun rei tak chhung a khel ṭha zawk kan ni. Player-ten kan game plan angin an khel chhuak a, first half-ah kan khel ṭha lehzual.

Player-te huaisen rah a ni a, inkhelh hmain khawl ang mai an nih thu ka sawi a, Man United lakah an theihna an lanchhuahtir.

Kan ṭha tawk lo. Kan phur tlai hret a, comeback beiseina hial pawh kan nei. Amaherawhchu 3-0 chu a tam mah mah deuh. Kan ṭha tawk lo a, cross ball kan ven danah kan hlawhchham. A pawi ber erawh Istanbul-a kan chak loh kha a ni. 

#OleOut

Manchester United-in RB Leipzig an hneh lo a, Premier League club zinga Champions League knockout  thleng thei lo awmchhun an ni. Ole Gunnar Solskjaer mawhphurhna bera ngaitu an tam hle. Social media lamah chuan #OleOut tih thawm a ri ring nghal a, Norwegian manager thutlukna an hrethiam thei lo.

Solskjaer-a'n Old Trafford-a 5-0 zeta an sawp tawh Leipzig lakah defence panga a hmang a, inkhelh ṭan hma hauhin a dawih zawkah an ṭang. Inkhel pawimawhah Solskjaer-a'n khelh dan thar a duang a, a fuh lo. 

Mual sira awm Aaron Wan-Bissaka-a'n tihsual langsar a ngah a, tihfuh a nei meuh lo. Alex Telles pawh AWB ang thoin goal an chhuahnaah player ven tur a veng bik lo.

Champions League-ah substitution panga siam theih a ni a, defender panga hmangtu Solskjaer-a'n goal an mamawh chungin bench aṭanga a luhtir player panga zinga pathum chu defender an ni.

Solskjaer hian an tlak chhanah khualmuala Instanbul Basaksehir an hneh loh chu chhan bulpui a nih thu a sawi a, a dikna chen a awm. Amaherawhchu hemi ṭuma an goal venhim dan hi football expert-te nuih zat a ni.

Manchester United thuneituten an manager Solskjaer-a chunga rinna an nghah thu an sawi a, tunah erawh an ngaihtuah ṭhat leh a ṭul dawn. 

Inrinni zan hian Man United-in Pep Guardiola kaihhruai Manchester City an mikhual dawn a, #OleOut titu United ṭantuten Manchester derby-ah Man City an ṭan ta a nih pawhin mak ti suh.