Rochharzela - a hming lam nawn a ngai!

Mizo tlangval Rochhar-zela chuan Indian Super League-ah a vawi khat nan inkhel bul a ṭan a, NorthEast United tan goal hmahruai thawkchhuakin Bengaluru nen 2-2 in an inhnehtawk. 

Aizawl FC winger hlui hian minute lina lekah Bengaluru keeper Gurpreet Singh Sandhu theihna fiah tumin shot a nei a, hei hian striker Luis Machado darah perin goal-ah a lut a, Machado goal khungah pawm a ni - Chhara hian East Bengal lakah a lo khung tawh a, ISL match thum a khelhah goal hnih a hlawh chhuak der tihna a ni. 

Bengaluru-in Juanan Gonzalez (13') leh Udanta Singh (70') hmanga an chhanlet hnuin point thum hlawh chhuak turah an inngai hman a, mahse minute 78-naah Machado bawk a inlar. 

Portuguese Primeira Liga club Moreirense aṭanga Highlander zawmtu hian NorthEast United tan si phurh a sut a, a tawpah team pahnih hi point khata an lungawi a ṭul. 

NorthEast United tan Chhara bakah Lalrempuia Fanai chuan inkhel bul a ṭan a, Lalengmawia chu minute 50-naah Rempuia thlakin luhtir a ni bawk. 

Zanin dar 7:30 hian match thuma chak la nei lo, Jeje Lalpekhlua khelhna East Bengal leh Jamshepur FC an inkhel dawn. Men of Steel-ah hian defender Laldinliana Renthlei, Ricky Lallawmawma, midfielder Isaac Vanmal-sawma leh striker William Lalnunfela-te chu player pawimawh an ni.