Serie A champion Inter Milan: AC Milan hnehin nomawi an lawm
Chak zawk nih a nuam a, hmelma leh elpui hneh a nuam zual - Inter Milan chuan an hmelna leh an elpui AC Milan an hneh a ni satliah lo a, an chak bakah a vawi 20 nan Italian champion an nihna an nemnghet.
Milan club pahnih inkhel hi 'Derby della Madonnina' tih a ni a, a boruak sanzia chu inhrilh nawn a ngai lo. Inter hian 2-1 a hnehin a chang, tun season league match khelh hmabak panga nei chungin an champion fel der.
Simone Inzaghi naute hian Serie A match 33 aṭangin point 86 an hmu a, an khelh hmbakah point hmuh belh theih 15 lai la awm mah se, anmahni hnaih bertu Milan aia an san zawkna chu point 17 a nih tawh avangin umphak theih an ni tawh lo.
Boruak a sang
Khelmual an inṭawm a, a hming chu San Siro a ni. Tun ṭumah hian AC Milan chu mualneitu chan chang zawk an ni a, entu fans an nei tam thei zawk tihna a ni, anmahni khelmual ni ve tho mah se Inter chu mikhual lam an ni thung.
Ṭum dang ang bawkin a tir aṭangin inkhel boruak a sang a, inchilh deuh rap leh ball awm mumal loa in nek luih deuh sak sak pawh an hreh lo. Inter tan box chhunga ven loha awm Francesco Acerbi-a'n goal khatna a tauh lut a, chawlhlawk laiin 1-0 in hma an hruai.
Second half tirah Marcus Thuram chuan goalkeeper Mike Maignan dan theih loh tura kilah an goal hnihna a khung a, chak tur a chiang. Hun tawp dawnah Fikayo Tomori-a'n Milan tan goal khat khungin phur thar ve leh mah se awmzia a nei phak tawh lo.
Minute 90 chhung boruak ṭang taka an khelh chu a tawpah a puakkeh! Hun tawp hma deuhin buaina a chhuak a, kut thawhtu Denzel Dumfries leh Theo Hernandez te hnawhchhuah an ni a, buainaa inrawlh dang Milan captain Davide Calabria pawhin red card a hmu zui.
Inkhel a tawp meuh chuan AC Milan hian khelmual chhungah player pakua chiah an nei tawh - Inter pawh an kim tawh bik lo. Milan Derby a nih avangin player pathum hnawhchhuah an ni hi a mak hran lo a, nomawi chawi leh chawi loh kar a nih bawk avangin boruak a sang.
Inter chungnung
Milan Derby bika Serie A nomawi chawi tur chinfel hi thil awm khat tak a ni, kum 116 hnua hetiang a thlen lehna hmasa ber a ni hial. Inter captain Lautaro Martinez chuan, "Lawm avangin hnuk a ulh a, bianga mittui luang kan dang zo lo.
"Hetiang hun tawng tur hian kan thawkrim, a tawpah a rah kan seng. Champion avanga lawm hun a ni a, a dang chawi belh chakin kan tuihal reng tur erawh a ni ang," a ti. Martinez hian Inter tan tun season-ah goal 25 a khung a, an champion theih nan a thawhhlawk hle.
Italian manager Inzaghi tan pawh hun lawmawm bik a ni. Kum 2021 khan Inter Milan a enkawl ṭan a, a tirah chuan league nomawi chawi turin an ṭha tawk lo. Mahse, zawimuangin team a din a, kum thum a liam meuh chuan Serie A an thunun hneh hle.
Inzaghi chuan, "Zan duhawm, theihnghilh ngai tawh loh tur chu kan tawng. Inter tan hun lawmawm a ni a, thuneitu sang president aṭanga fans zawng zawngte tan pawh lawm hun a ni," tiin a sawi a, an khelh hmabakah inthlahdah an tum chuang lo tih a sawi bawk.
Season hmasa khan Inter hian Champions League final an lut bawk a, mahse Manchester City lakah an chak lo. Kuminah pawh last 16 an thleng leh bawk - Italy ramah chuah ni loin European club lian dangte an elphak tihna a ni.
