CYMA Cricket khel ṭan dawn ta

Central YMA leh Cricket Association of Mizoram (CAM) buatsaih 12th Inter Branch YMA Cricket Tournament 2024 chu vawiin aṭangin Ramhlun Sports Complex leh Joint YMA Field, Vaivakawnah khelh ṭan a ni dawn. Inelna hi April 22, Thawhṭanni zan khan a vuak hawnna neih a ni a, Central YMA vice president Prof. Lalnuntluanga chuan a vaw hawng.

Prof. Tluangtea chuan, "Mizorama kum 26 chhunga Cricket in hma a sawn dan hi a ropui takzet a, Mizo ṭhalaiten cricket avanga sum tam tak an lo la lut ta hi a lawmawm a, hemi kawnga Cricket Association of Mizoram (CAM) te thawhrimna rah kan hmuh hi a lawmawm in an fakawm hle a ni," a ti.

Tluangtea chuan sawi chhunawmin, "Ram leh hnam humhalhna atan a pawimawh ber pakhat chu intodelh hi a ni a, hemi kawngah hian cricketer-ten anmahni leh an chhungte an chawmna tur cricket hmanga an hlawh chhuak thei hi a hlu hle mai. YMA chuan hei hi kan ngaihlu a, a ṭul ang zela thawhpui a dawmkan zui zel hi kan duh a ni," tiin ṭhalaiten cricket hmanga sum an lalut chu a lawmthu a sawi.

Kumin inelnaah hian branch 49 an tel a, knockout hmanga inelna hi neih tur niin final hi May 11, Inrinnia khelh tur a ni ang. Vawiin hian Ramhlun Sports Complex-ah Tuithiang leh Mission Veng ten match hmasa zawk an khel ang a, Upper Republic Veng leh Sihphir te chawhnuah an inkhel ang. Joint YMA Field, Vaivakawnah match hnih tho a awm dawn. Kanan leh Khatla bakah Lawipu leh Ramthar te an inkhel ang.

CYMA cricket hi kum 2003 aṭang khan neih ṭan a ni a, champion hmasa ber chu Armed Veng an ni. Champion lai leh champion ngun ber chu Ramhlun Venglai an ni a, vawi nga an champion tawh bakah a hnuhnung pathumah an champion zawn bawk.