Vawiinah Women's League semifinal

MFA Women's League semifinal chu vawiin hian Lammualah khelh a ni dawn. Chawhma dar 11:00-ah league round-a pakhatna Mizo Football News leh SYS FC 'A' te an inkhel ang a, chawhnu dar 1:00-ah 1215'S leh Kulikawn FC te an inkhel zui ang.

Sanga enkawl MFN

Laipuitlang club Mizo Football News hi Santosh Trophy-a Mizoram coach Lalsangzuala Hmar enkawl an ni a, champion tura rinkai an ni.

MFN hian league round-ah SYS FC 'A' hi 2-1 in an hneh a, goal hnih Lalthansangi khung a ni. Thansangi hian tun inelna a hmang ṭha a, goal 10 a khung tawh.

Chutihrualin Thansangi thlawp tur hian Grace Larampari, Lalduhthlani Pachuau, Lalhruaizeli Khiangte (Nupuii) leh Cindy Remruatpuii Colney te an awm. Grace-i hi inhliam vangin match tam zawkah a awl a, league match hnuhnung berah a lo kir leh tawh.

SYS FC 'A' hi hmeichhe coach lar pahnih R. Lalnunsangi (Manuni) leh Lizzy Lalhmingsangi te enkawl an ni a, hmeichhe football hrechiangtu an ni. Tlarhmaah Lalsangpuii Sailo an kawl a, ani hian goal 14 a khung tawh.

Lallawmzuali leh Lalmuanpuii Khiangte te pawh team tan an ṭangkai viau bawk. SYS FC 'A' hian league round-ah 2-1 chauhin an hneh lo a, semifinal-ah hneh ngei an tum ang.

1215'S Vs Kulikawn FC

ITI Veng club 1215'S leh Kulikawn FC te hi inkhel tawk tur zawka ngaih an ni a, chak tur pawh hriatthiam a har. 1215'S hian league round-ah Zamdeihchhingi goal hnih hmangin 2-1 in an hneh.

1215'S hian player ṭha Lalbiakdiki, Lalramdintluangi leh Zairemmawii Chawngthu te an kawl a, champion hial pawh inbeisei thei an ni.

Chutihrualin Kulikawn FC hi match hmasa pathumah an chak vek a, semifinal an luh hnuah an tha an thlah ve hret niin a lang.

Kulikawn hian Lalrinmuani, Lalthantluang Hrangkhol leh Sandra Beipieso Nottlia te an nei bawk a, league round-a an hneh loh 1215'S hi hneh let ngei an tum dawn a ni.