Manchester United leh Thomas Tuchel an sawizawm

Khawthlang media te chuan tun season tawp ruala Bayern Munich chhuahsan tur Thomas Tuchel-a'n Manchester United-ah manager hna a ruak a nih chuan Old Trafford pan a duh niin an tarlang. Tuchel hi agent nen inremna an nei tawh a, hmabak thui tak la awm mah se tuna Man United-a thuneitu INEOS zingah German manager duhtu an awm niin sawi a awm bawk.

Season chawhnu lam a nih tawh bakah nipui bazara inhawn hnaih avangin thu lengvak a tam a, chutihrualin hriat tur pawimawh chu Man United manager Erik Ten Hag hian kum 2025 thleng daih contract a nei a, an ban a nih loh chuan Old Trafford-a manager hna chelh zel a la duh.

Chutihrualin tun season-a Man United chet ṭhat tawk loh avangin Ten Hag-a dinhmun a nghing. FA Cup final thleng mah se Coventry an hneh dan avangin Dutch manager ban duhtu an pung sawt a, club thuneitute thutlukna tur erawh a la chiang lo.

Ten Hag hian season hmasa berah League Cup nomawi a chawi a, FA Cup final a lut bawk. Season hnihnaah Man United-in FA Cup final an lut miau a, Ten Hag-a pawhin a hna a chan theih dan kawng a awm. Dutch manager tan Old Trafford-a thuneihna chelh zel turin match khelh hmabak apiang a pawimawh tawh a, zanin dar 12:30-ah Sheffield United an mikhual hunah pawh result ṭha an neih ngei a ṭul ang.