Novak Djokovic tan Laureus Award

Infiamna peng hrang hrang huapa chawimawina siam - Laureus World Sports Awards 2024 sem a ni a, award ngaihhlut ber Sportsman of the Year chu tennis world number 1 Novak Djokovic kutah hlan a ni.

Mipui ngaihven hlawh zingah Jude Bellingham hming a lang. Borussia Dortmund aṭanga Real Madrid zawmtu hi Breakthrough Player of the Year atan thlan a ni a, footballer zingah he chawimawina dawng thei hmasa ber a ni hial.

Djokovic chungnung

Laureus World Sportsman of the Year hi Djokovic tan thil thar a ni tawh lo, kumin hi vawi nga a dawn tlinna a ni tawh. Mipa ang bawkin hmeichhe tan chawimawina a awm ve bawk a, Barcelona midfielder Aitana Bonmati-i chuan a dawng ve bawk.

Season hmasa khan Djokovic hian Grand Slam pali a khel kim vek - Australian Open leh French Open nomawi a chawi, grass court inelna lian Wimbledon final a lut bawk a, major title la hnem ber Margaret Court-i record (24 titles) a nih rual hial.

Kum 36 mi Djokovic chuan, "A vawi nga nana Laureus World Sportsman of the Year Award ka dawng hi ka lawm. Kum 2012 season kha ka ngaihtuah let a, kha tih lai khan kum 24 mi chauh ni chungin ka lo dawng tawh, kum 12 a liam hnuah ka la dawng thei hi ka lawm.

"Ka tan chuan nikum kha hun ṭha tak a ni tihna a ni a, a hma lawk kuma ka khelh theih loh Australian Open ka khel leh thei te, chu mai bakah French Open-a hlawhtlina ka chang te kha ka tan chuan a hlu takzet a ni," tiin a sawi.

A hming Bellingham

Rawlthar a nih lai aṭanga mi hriat hlawh a ni a, kum 20 a tlin meuh chuan Jude Bellingham chu Real Madrid innghahna a ni der tawh. Spanish club lian hian nikum nipui bazar lai khan Dortmund aṭangin pound maktaduai 89 sengin an la lut a, an tisual lo hle.

Tun hnai mai khan England international midfielder hian El Clasico-ah chakna goal a khung a, an hmelma Barcelona an hnehna goal hi tun season chhunga goal 17 a khung tlinna a ni nghal bawk - La Liga nomawi chawi mai thei dinhmunah an ding mek.

Kar hmasa khan Bellingham awmna Real Madrid hian Champions League champion lai Manchester City chu quarterfinal-ah an lo hneh tawh bawk a, nomawi ngaihhlut pahnih La Liga leh UCL chawi turin kawng dik an zawh mek zel a ni.

Kumin nipuiah European Championship khelh a ni dawn a, ram leh ram inelna lianah hian Bellingham hi England tan pawh innghahna a ni dawn a, hliam nei loa a khel tluang a nih chuan chawimawina sang dang dawng tur pawhin kawng a inhawng.