Champion tum leh tlak hlau - Merseyside derby chu

Khaw khat chhuak, Premier League khel ve ve an ni a, an tum leh beisei erawh a inthlau ta hle. Zanin dar 12:30 hian Merseyside derby-ah Everton chuan Liverpool an mikhual dawn a, inkhel hmuhnawm a beisei ngam.

Table aṭanga teh chuan team pahnih an inthlau a, mahse, khaw khat chhuak club pahnih hi an inhalna boruak leh tun hmaa an lo intawn tawhnate thlir chuan inkhel boruak sang beisei a fuh a, an hmaa inchhawp a hraw bawk.

Everton hi league-ah 16-na an ni mek a, match nga chiah khelh tur nei tawhin, tla thei china awm Luton Town aia an sanna hi point nga chauh a ni - Everton hi thih leh dam karah an leng, tiin a sawi theih a, zanin hi nunna nei tura thawk lak hun a ni.

Liverpool erawh champion beisei an ni a, table-ah pahnihnaah awm mekin, an chunga awm Arsenal nen an point hmuh zat a inang. Mahse, an hnuai chiaha awm Manchester City hi anni aiin point khat chauhin an hniam a, match khatin an khel tlem zawk bawk.

Everton buaina

Tun season-ah Everton an talbuai takzet. Khelmuala beisei an phak lohna chu thuhran ni se, khelmual pawnah an buai tel a, an sum hman danah Premier League dan bawhchhiat an neih avangin point riat paihsak an ni tawh!

Mahse, derby boruak 'hot' tak an hmachhawn hmain Everton an insiamṭha hlauh hman a, an vannei. Kar hmasa lawk khan Chelsea chuan 6-0 in an sawp a, mahse, kartawp inkhelah insiamṭhain Nottingham Forest chu 2-0 in an hneh.

Forest an hneh avangin Toffees (Everton sawina) boruak hniam lutuk tur a kang ve hret a, hliamin a tihbuai Jarrad Branthwaite leh Dominic Calvert-Lewin ten Forest an hmachhawn theih avangin beiseina thar a awm ve bawk.

Hetihlai hian Forest lakah hliam vangin striker Beto lakchhuah a ngai a, Portuguese forward hian Liverpool a hmachhawn thei dawn lo. Goodison Park-a point thum hmu tura a pawimawh ber erawh goal khung a ni a, tun season Premier League-a goal khung tlem ber dawttu Everton (34 goals) hian an ti thei ang em, tih erawh zawhna a ni.

A hahthlak

Liverpool fixture a chep takzet a, player-te pawh an chau ang tih a chiang. A bik takin April thlaah Reds an talbuai a, mahse, Everton an hmachhawn hmaa an match hnuhnung berah an insiamṭha hman a, 3-1 in Fulham an hneh.

Jurgen Klopp lawmna tizual turin rei tak chawl tawh player inhliam an lo kir ṭan a, duh ang thalin squad a siksawi thei. Fulham laka bench-a awm player-te kha thlir ila, bul ṭan tura awhawm tak vek an ni.

Mohamed Salah, Alexis Mac Allister, Darwin Nunez, Dominik Szoboszlai leh Ibrahima Konate te bench-ah an awm a, zaninah chuan bul an ṭan ang - Everton tan fimkhur a finthlak dawn.

Trent Alexander Arnold lo kir leh ta hian set piece-a Liverpool hlauhawm ṭhinna a rawn keng tel leh ta a, Diogo Jota-a'n a goal khung thiam a lo la theihnghilh lo tih Fulham lakah a pholang bawk.

Beiseina

Liverpool hian tun season-ah League Cup nomawi an chawi tawh a, mahse, an beisei em em FA Cup leh Europa League aṭangin an tla a, Premier League nomawi chawi tur pawhin an hmabak match-a an chak vek a, Arsenal leh City chetsual chan tel a ngai.

Season tawpah Klopp a chhuah dawn bawk avangin Reds-in Premier League nomawi nena thlah ngei an duh a, an tih theih chu an hmabak match-a chak vek a ni. German coach hian Fulham an hneh zawhah "A pawimawh ber chu kan chak zel a ni a, chu chu kan tum ang," tiin a sawi.

Liverpool an chak dawn chuan chance tam tak an hlah ṭhin goal-a chantir zel an zir a ṭul a, tun season inelna hrang hranga goal 24 khung tawhtu Salah-a'n goal khung thei satliah ni loin, champion pui thei player a ni, tih a pholan a ṭul.

Kum 24 mi Nunez-a'n tun season-ah goal 18 khung tawh mah se, a chance hlah zozai avangin dem a hlawh a, Liverpool ṭantute rinna hlawh let turin Merseyside derby-ah goal a khung a ṭul.