Champion ngei kan duh - Lianzuala

Mumbai City forward Lallianzuala Chhangte chuan Indian Super League-a champion ngei an tum thu Vanglaini a hrilh a, an beiseina tihlawhtling tur erawhin semifinal-a FC Goa an hneh phawt a ṭul dawn - zanin dar 7:30 hian semifinal first leg an khel ang.

AIFF Player of the Year ni lai LZ Chhangte chuan, "Kan inbuatsaihna a ṭha a, kan phur tlang khawp mai. Khualmuala kan khelh dan hian thui takin kan hma hun a hril dawn a, final luh ngei kan inbeiseina erawh a sang khawp mai," tiin Vanglaini a hrilh.

ISL semifinal hi double leg-a khelh a ni a, April 29, Thawhṭanni zanah Mumbai hian Goa an mikhual ve leh ang. Lianzuala sawi angin khualmuala hnehna chan hmasak hi Mumbai tan a pawimawh dawn.

Season hmasa ISL-a hero of the league ni thei Lianzuala chuan, "Shield kan chân tawh a, nomawi hi chu hawn ngei kan duh khawp mai," a ti - match thum chiah an hmabakah a awm ta.

Mumbai City hian ISL league winner shield dawng turin league match tawp bera point khat hlawh chiah an mamawh. Mahse, Lianzuala goal khungna inkhelah 2-1 in Mohun Bagan an ngam lo a, Kolkata club hian Shield an dawng ta daih - Mumbai tan ISL nomawi chân a rem lo.

Lianzuala chuan, "Bagan lakah khan hliam tenau nei chungin ka inkhel a, mahse, Pathianni aṭang khan full training ka zawm leh thei tawh a, ka fitness pawh a ṭha," tiin Goa hmachhawn tura a inpeih thu a sawi.

Mumbai forward Lianzuala hian tun season-ah league match 22 khelin, goal sarih a khung tawh a, assist vawi ruk a nei tawh bawk - hun pawimawhah a team tan a che ṭha ṭhin.

Lianzuala bakah Lalengmawia Ralte (Apuia) leh Hmingthanmawia (Valpuia) te chu Mumbai club tan hian an khel a, midfielder Apuia hian league match 19 khelin goal khat a khung tawh a, assist vawi hnih a nei bawk - defender Valpuia hian league match 10 a khel ve tawh thung.

FC Goa lamah Ayush Dev Chhetri chu Mizoram player awmchhun a ni thung a, Dinthar tlangval hian tun season-ah league match 10 a khel ve tawh bawk.

Mumbai hi league-a pahnihna an nih avangin semifinal an lut sa a, FC Goa erawhin April 20 khan playoff khel hmasain, Chennaiyin an pet chhuak a, ni nga ngawta Mumbai an chawlh rei zawk avangin Goa aiin Mumbai-in inbuatsaihna an nei ṭha zawk.