Pro Volleyball Diakkawn leh Serkawn inlan hun

Ather Pro Volleyball League chu nizan khan khelh ṭan a ni a, zanin dar 8:00 aṭangin hmeichhe league khelh ṭan a ni ang. Diakkawn leh Serkawn ten kumin PVL hmeichhe match hmasa ber hi an khel dawn a ni.

LPS Arena, Falkland Vengah inelna hi neih a ni a, nizan kha a hawn zan niin en man a awm lo, zanin aṭang erawh chuan mi pakhat tan Rs 50 zel a ni tawh ang a, in lama en duh tan LPS chuan live kaltlangin a en theih bawk ang.

Kuminah hian inelna palphung tih danglam hret niin, hmeichhe inkhelah point 15 game hman a ni dawn a, set nga zel an khel ang.

Pro Volleyball vawi sarihnaah working committee chuan hmeichhe league inkhel hmuhnawm zawka buatsaih a nih theih nan point 15 game tura ruahmanna a siam chu kal tlangpui a ni dawn a ni.

Inkhel apiangah set nga zel khelin point 15 hmu hmasain set an la dawn a, chutihrualin dan pangngai angin lehlam nen point hniha an inthlauh a ngai a, set khat lakah point khat zel an hmu ang.

Semifinal aṭangin mipa khelh dan point 25 game, set thum la hmasa chak zawk anga kalpui a ni thung dawn a; working committee chuan tun aia nung zawka Mizo hmeichhiate an inkhelh theih nan he ruahmanna hi an siam a, inelna a san phah bakah a hmuhnawm zawk ngei an ring a ni.