Udinese manager thar Cannavaro

Serie A club Udinese chuan Italian defender ropui ber pawl Fabio Cannavaro chu season tawp thlenga an manager ni turin an la lut a, Italy captain hlui hian tla thei dinhmuna ding mek Udinese hi an mangchhia aṭanga tihharh a tum ang.

Udinese hian Pathianni zan khan anmahni ang thoa team talbuai Verona chu 1-0 in an hneh lo a, coach Gabriele Cioffi an ban zui - Serie A-ah 17-na an ni mek a, relegation zone chung chiahah awm mah se, 18-na Frosinone nen an point hmuh zat inangin, point 28 ve ve an nei a ni.

Cannavaro hian Ningani zanah Udinese hi AS Roma lakah a kaihruai nghal dawn a, mahse, minute 18 chiah a ni dawn! Udinese hi AS Roma nen an inkhel hmasaah 1-1 in an inhnehtawk a, mahse, minute 18 a la awm tihin Roma player Evan Ndicka chu tluin, an inkhel chhunzawm thei lo - minute la bang hi an khel leh dawn a ni.

Kum 50 mi Cannavaro hian player a nih laiin Napoli, Parma, Inter Milan, Juventus, Real Madrid leh Shabab Al Ahli tan a lo khel tawh a, kum 2006 khan Italy captain niin, World Cup nomawi a chawi a, defender ni chungin Ballon d'Or a dawng hial.

Cannavaro hian kum 2011 khan inkhelh chawlhsanin, coaching a luhchilh a, UAE club Al-Ahli-ah assistant coach-a bul ṭanin, Chinese club Guangzhou Evergrande, Tianjin Quanjian leh Saudi Pro League club Al Nassr te enkawl tawhin, China national team chu kar ruk chhung a enkawl tawh bawk!

Serie B club Benevento a lo enkawl tawh bawk a, China bikah hian coaching lamah chuan a che ṭha viau - Evergrande chu Chinese Super League leh Chinese FA Super Cup a champion pui a, Tianjin Quanjian chu China League One-ah nomawi a chawipui bawk. Kum 2017 khan Chinese Football Association Coach of the Year-ah thlan a ni.