El Clasico-ah Barca an lungawi thei lo

Pathianni zan khan Spanish football-a inkhel ngaihven hlawh bera chhal ngam El Clasico khelh a ni a, kum 16 mi Lamine Yamal goal khung pawm a nih loh avangin Barcelona an lungawi thei lo - club president Joan Laporta chuan dan anga hma an lak mai theih thu a sawi.

Santiago Bernabeu-a inkhelah hian 1-1 a nih laiin Yamal hian goal hi a khung a, Real keeper Andriy Lunin chuan goal line chhung aṭangin ball hi a lo dang chhuak a, mahse, goal line a pel ngei niin a lang.

Mahse, referee chuan goal hi a pawmsak lo a, La Liga-ah goalline technology hman a la ni bawk si lo - video assistant referee (VAR) hmanga ennawn niin, VAR thutlukna erawh a goal lo, tih chu a ni.

Catalan club tana rilru nat tizual turin Jude Bellingham chuan hun pek belhah Real tan chakna goal a khung zui a, 3-2 in Real hian hnehna an chang - he inkhel result hian Barca tana nomawi beiseina chu a thamral tir tih pawhin a sawi theih.

Laporta chuan Spanish FA Technical Refereeing Committee hnenah kha thil thlenga audio leh video an dil tur thu a sawi a, an zirchian hnuah a lo goal chiang ngei a nih chuan a ṭul anga hma an lak tur thu sawiin, "Hmun danga VAR tihsual vanga an inkhel nawn ṭhin ang pawhin kan dil mai ang," a ti.

Season ṭantir khan Belgian Pro League-a VAR tihsual vanga thil thlengah Anderlecht leh Genk chu inkhel nawn tura tih an lo ni tawh a, mahse, infiamna khawvela thuneitu sang ber Court of Arbitration for Sport (CAS) chuan he thutlukna hi a sutsak thung.

Liverpool boss Jurgen Klopp chuan Premier League-a Tottenham Hotspur nen an inkhelh ṭuma, dik lo taka Luis Diaz-a goal khung pawm loh avangin inkhelh nawn a lo ngiat tawh.

Barca president Laporta chuan, "Official-te harsatna hi kan hrethiam a, mahse, chumi avang tak chuan VAR hi a awm. An tihsual siamṭha turin VAR a awm a, mahse, tihsual nan an hmang zawk si," a ti a, a lawm lo hle.