Rajasthan tan Jaiswal

Rajasthan Royals chuan Thawhṭanni zan khan Mumbai Indians chu wicket kua zetin an sawp a, Yashasvi Jaiswal-a'n century a siam. Kum 22 mi Jaiswal hian ball 60 lekah 104 a vaw chhuak a, a dam tluan bawk.

Sawai Mansingh Stadium, Jaipur-ah Mumbai Indians-in vuak hmasak an thlang a, Tilak Varma-a'n 65 runs a siam zarah 179/9 runs an vaw chhuak. Royals bowler Sandeep Sharma-a'n wicket nga lain 18 runs chauh a pe a, a khel ṭha hle.

Royals tan target tam a ni lo a, hna awlsamna turin opener pahnih Jaiswal leh a kawppui Jos Buttler (35) te an che ṭha a, captain Sanju Samson pawhin hna rawn thawk ṭhain thi loin 38 runs a rawn siam ve bawk. Rajasthan hian over 18.4-ah 183/1 runs siamin hnehna an chang.

Zanin dar 7:30 hian Delhi Capitals leh Gujarat Titans te an inkhel ang. IPL-ah hian a sang pali chinin knockout stage an khel thei a, chutihrualin knockout hi qualifier 1, eliminator leh qualifier 2-a ṭhen a nih avangin pahnihna china awm a pawimawh hle.