Denver Nuggets an chak nawn

NBA champion lai Denver Nuggets chuan hun tawp dawna Jamal Murray-a basket neih hmangin Los Angeles Lakers chu 101-99 in an hneh. NBA playoff khelh laiah Nuggets hian 2-0 in best of seven series-ah hma an hruai mek.

Nuggets hi an khel ṭha tawk lo, an hniam fal lai phei chuan point 20 teh meuha hniam zawk lai pawh an nei. Mahse, Murray leh a ṭhiante an ding chhuak a, an chak theih nan Murray hian point 20 a nei.

Lakers thiampuipa Anthony Davis-a'n first half chhung lek pawhin point 24 a nei hman a, a team hian 59-44 in chawlhlawk laiin hma an hruai, quarter thumna khelh lai pawhin 68-48 laia san zawk lai pawh an nei hial.

Amaherawhchu, quarter hnuhnung berah Nuggets hian point 32 an neih laiin Lakers hian point 20 bak an nei thei lo a, a tawpah champion lai hui vannei zawkin point khat lekin an chungnung ta zawk.

Nuggets chak puitu Murray chuan, "Ka chet fuh tawk loh lai khan ka tho chhuak leh ang tih hi ka ring tlat a, ka ṭhiante khan basket nei turin shot turin min fuih nasa hle bawk, a tawpah chuan kan zavaia kan beisei ang ngeiin a thleng," a ti.

Hun tawp hma second 16 chauh awm tawhah Lakers tan LeBron James-a'n ball a chang a, chak nemngheh theihna remchang nei mah se 3-points neih tuma a shot chu a hlah, hei vang hian Murray chuan chakna basket an neih theih phah.

April 26, Zirtawpni zing dar 7:30-ah game 3 an khel leh ang, tlang tur chuan a tlem berah vawi li chak tlin a ngai a ni.