Arsenal lakah Chelsea an Zawr

Premier League hmahruaitu Arsenal chuan an mikhual Chelsea 5-0 in an sawp a, a chung berah an dinhmun an sawhnghet - Pathianni zanah Tottenham Hotspur nen 'North London Derby' an khel zui leh nghal ang.

Thawhlehni zan Emirates Stadium-a inkhelah Gunners tan Leandro Trossard-a'n goal hmahruai a khung hnuah, defender Ben White leh forward Kai Havertz ten goal hnih ve vein an belhchhah a, nuamsa takin an chak.

Mikel Arteta naute hian EPL match 34 aṭangin point 77 an hmu a, pahnihna Liverpool chuan an hmabakah hnehna chang mah se goal difference lamah an tluk dawn rih lo - champion lai Manchester City tan a chung bera awm turin vawi hnih chak a ngai thung.

Goal a sur

Mikel Arteta-a'n a player neih laiah chuan an ṭhat dan takin team a rem tia sawi ngam a ni a, mikhual Chelsea erawhin tun season chhunga an player pawimawh leh ṭha bera chhal ngam Cole Palmer chu damlohna vangin an chhawr thei lo thung a ni.

A tir aṭangin boruak a nung nghal phat - Declan Rice chuan mual sir lama awm Leandro Trossard tan a pe a, Belgian forward hian Chelsea keeper Djordje Petrovic ke bul maiah na zetin a pet a, minute lina lekah goal khatna a lut.

Gunners lamin inkhel an thunun zui. Thomas Partey hmaah Rice awmin a duh tawkin a tal kual vel a, England midfielder hian mawi taka ball a vir pui hnuah goal bar chungah a thlawh liam - Havertz leh Bukayo Saka te pawhin hun ṭha an khawhral.

Second half-ah chuan Arsenal lamin an duh hun hunah an khung emawni tih mai tur a ni. Awmna tur hmun thlang dik White-a'n chep deuh karah a khung a, counter attack aṭanga Havertz goal khung a hmuhnawm, amah vengtu Marc Cucurella leh Petrovic tan dan ngaihna a awm lo.

German forward Havertz hian a hnu lawkah goal kilah an goal lina a khung zui, a goal khung pahnih hi captain Martin Odegard leh Saka te siamsak a ni a, an goal hnuhnung ber erawh White-a'n Odegaard ball pek cool taka a khung a ni thung.

Kawng dik zawh

Aston Villa leh Bayern Munich lakah an chesual a, a hnuah erawh Arsenal an tho chhuak leh ta. Wolves lakah goal chhuah loin hnehna an chang a, mi ṭhenkhatin an chetsual theihna tura ngaih Blues lakah goal an surtir thei leh ta bawk.

Hun tawp dawn lam minute 20 bawr la awmah Arteta-a'n a player ṭha - Partey, Havertz, Trossard leh Takehiro Tomiyasu te a la chhuak a, a hnu lawkah Saka chu hahchawl turin a la chhuak thei bawk; Spurs nena an inkhelh tur a ngaihtuah tel thei tihna a ni.

Arsenal manager Arteta chuan, "Team ṭha tak leh player ṭha tak tak awmkhawmna kan tum a, anni lakah ṭha taka kan khelh theih avangin ka lawm. A tir aṭang khan engkim mai kha a fuh em em vek a, team leh min ṭantute tan inkhel manhla tak a ni chiang hle.

"Tuna kan hnehna hian inrintawkna nasa tak min siamsak leh dawn a, tun dinhmun thleng tur hian theihna kan nei a ni tih a takin kan lantir zel dawn a ni," a ti. Season hmasa khan a tawp lamah an chesual a, kuminah chuan a hmawrbawk ṭhat an tum.

Arsenal hian - Spurs, Bourenmouth, Manchester United leh Everton te an la hmachhawn dawn; an chak vek a nih pawhin Man City chetsual an ngaihchan tel a ngai tawh dawn. Match tawp ber thlengin nomawi inchuh a ngaihnawm ngei ang.

Harh ngai Blues

Chelsea hian chhuanlam tur zawng se la chuan Cole Palmer inkhel thei lo kha an sawi ngei ang a, an player ṭha a nih avangin a awm viau. Chutihrual chuan, player man tam leh hlawh hnem tak tak an la khawl hnem tho a, goal nga ngawt chhuah kha mualphona a tling.

Emirates Stadium chhunga inkhel entu, Blues fan naupang pakhat chuan, "I jersey kha ka duh a ni lo, kan tan hian theihtawp chhuahin khel ula tih hi ka duh zawk," tih inziahna a keng, hei hian thu a sawi thui hlein a rinawm - club tana ṭhahnem ngai taka khel player a hmu duh a ni.

Mauricio Pochettino chuan, "Goal kan chhuah hnuah kan zuai hle, chawlhlawk lai khan second half chu ṭha lehzual zawka kan khelh theih dan tur kan sawi. Mahse, goal kan chhuah belh a, goal thumna a luh hnuah phei kha chuan kan beidawng.

"Manchester City lakah ṭha takin kan khel a, mahse ni thum hnu lekah chuan kan zuai leh der tawh. Player khel thei lo sawiin awmzia a nei lo a, chutihrualin season tir aṭangin hliam vanga chhawr thei loh hi tam tak kan nei reng a ni," a ti.

Blues hian - Aston Villa, Tottenham, West Ham United, Nottingham Forest, Brighton leh Bournemouth te an la hmachhawn dawn a, season thara European football khel phak tur chuan Villa park aṭanga hnehna chan nghal a ngai tawh ang.