Bagan hnehtu Odisha-in ke lehlamin final an rap

Mizo player kawl hnemtu Odisha FC chuan an ke lehlamin Indian Super League final an rap ta - Thawhlehni zan khan semifinal first leg-ah Mohun Bagan Super Giant chu 2-1 in an hneh a, Sergio Lobera naute hian pen khatin final an hnaih ta sawt.

Bagan tan hian Manvir Singh chuan goal hmahruai khung mah se, Odisha hian Carlos Delgado leh Roy Krishna hmangin an chhanglet a, hun a tawp meuh chuan 2-1 in mualneitu team an chak.

Odisha khelmualah red card vawi hnih phawrh a ni bawk a, minute 67-naah Mohun Bagan striker Armando Sadiku chu a yellow card pahnihna avanga hnawhchhuah niin, Odisha tana goal khungtu Delgado chu minute 74-naah hnawhchhuah a ni bawk.

April 28, Pathianni zan dar 7:30-ah Odisha hian Bagan hi second leg khel turin an lenchilh ve leh dawn a, away goal rule hman a ni lo. Nizan khan semifinal inkhel dangah FC Goa chuan Mumbai City an mikhual a, an result kan hre hman lo.

Beisei loh

Odisha boss Sergio Lobera-a'n rin loh dan takin player a rawn rem a, tlarhmaah player hriam bik Diego Maurício hmuh tur a awm lo a, ISL starting XI-ah foreign player pali chiah hman theih a nih avangin Lobera hian fimkhur takin player a thlang.

Spanish coach hian tlarhnung laiah foreign player pahnih chhawr a duh si a, Senegalese centre back Mourtada Fall leh Spanish defender Carlos Delgado a inkawptir a, midfield-ah Morocco tana vawi kua inlan tawh Ahmed Jahouh awmin, tlarhmaah Mauricio aiin Roy Krishna chu rin hlawh zawk a ni.

Tlarhmaah Fiji captain hi mal tlatin, a hnungah amah thlawp turin Mizo tlangval Jerry Mawihmingthanga leh Isak Vanlalruatfela te an awm a, midfield-ah K. Lalṭhathanga (Puitea) chuan bul ṭanin, tlarhnungah Jerry Lalrinzuala'n bul a ṭan bawk.

Bagan lamah Sadiku chu tlarhmaa nawrtu niin, Manvir, Liston Colaco leh Australian striker Dimitri Petratos ten an thlawp a, midfield-ah Finland international Joni Kauko a awm thei bawk - team pahnih an ṭha dun hle.

Inkhel hmuhnawm

Beisei ang ngeiin inkhel pawh a hmuhnawm nghal a, Bagan lamin goal khung turin hun rei nghah an mamawh lo - Manvir Singh chuan minute thumna leka Dimitri Petratos-a corner pet aṭanga ball kal chu a tauh lut a, an hawihai.

Odisha-in na takin nawrlet zui mah se, Jerry Mawia leh Amey Ranawade te an vannei tawk lo. Mahse, rei erawh Odisha an hnufual lo - minute 11-na lekah Delgado chuan Jahouh-a corner aṭanga ball kal chu hnai set sawtah a khung a, 1-1 a ni.

Minute 39-na a ni a, Roy Krishna inlar hun a thleng. Kum 36 mi forward hian Bagan tlarhnung tihsual zarah hmahruaina goal a khung a, a club hlui laka goal khung a nih avangin a lawm duh lo.

Hun tawp thlengin team pahnihin goal an khung tawh lo a, red card pahnih kan hmu thung. Minute 67-naah Sadiku chu hnawhchhuah niin, mahse, Odisha-in a tam lam an nih an chhawr hman lo a, minute 74-naah Delgado hnawhchhuah ve zui a ni.

A la tawp lo

Odisha-in 2-1 in hnehna an chang a, mahse, second leg khelh tur a la awm miau avangin thlamuanga chawl thei an la ni lo. Odisha forward Isaka chuan, "Pathian zarah team ṭha tak kan hneh a, kan vannei a ni.

"Mahse, second leg a la awm a, ṭan erawh a la ngai khawp mai," tiin inkhel a la tawp loh thu Vanglaini a hrilh a, final luh ngei tuma second leg lamah an rilru an sen nghal tur thu a sawi.

Odisha midfielder pawimawh Puitea chuan, "Pathian zarah a vannei zawkah kan ṭang a, kan lawm khawp mai. Chutihrual chuan tunah chak mah ila, second leg hi tun aiin a harsa zawk dawn.

"Bagan hi chu ka hrechiang a, game boruak sang an ngam tlat zel. Chu mai ni loin player ṭha leh langsar an kawl nual a, anmahni khelmuala inkhel tur an nih tawh bawk avangin kan tan a awlsam dawn lo," tiin Vanglaini a hrilh a, a la ṭawng fimkhur hle.