Villa tan Emery a rinawm

Aston Villa boss Unai Emery chuan kum 2027 thleng Villa Park-a hun hmang turin contract thar a ziak a, Spanish coach-in Aston Villa-a contract thar a ziak hi thilmak a ni lo.

Arsenal coach hlui hian November 2022 khan Villa hi a enkawl ṭan a, Steven Gerrard a thlak. Khatihlai khan Villa hi Premier League-ah 16-na niin, relegation zone an hlat lo hle.

Mahse, Emery-a'n hna ṭha tak thawkin, pasarihna ni chungin season a kharpui a, Europa Conference League khel tura tlinpuiin, 2010-2011 season hnua Villa-in European football an khelh leh hmasak ber a ni.

Tun season-ah pawh Emery hian awihawm lo khawpa ṭhain Villa hi a kaihruai a, Premier League table-ah palina ni mekin, season thara Champions League khel thei dinhmunah an ding mek - an hnuai chiaha awm Tottenham Hotspur aiin point rukin an sang zawk a, match hnihin an khel tam thung.

Emery chuan a coaching staff-te nen Villa neitute duhna an hriatchian thu sawiin, Villa chu hmasawnpui zel tura theihna an neih thu a sawi.

Spanish coach chuan, "Theihtawp kan chhuah chhunzawm zel a ṭul a, club neitute nena thawhhona ṭha tak kan neih pawh chhawm nun zel a ṭul. Hei aia ṭha zawka thawh ho zel kan tum ang a, kan inpui tawn zel ang. Hmasawn duhna kan nei a, chu chu kan rilrua kan vawn reng pawh ka duh," a ti.

Villa hian Emery-a contract pawhsei theihna dan hi an nei sa a, chu chu an hmang phawt. Nipuiah Spanish coach hi hun rei zawk an hnena cham tura contract thar la zawrh leh an tum niin khawthlang media-te chuan an tarlang.

Emery hian Premier League-a Villa a chet ṭhatpui bakah hian, Europa Conference League semifinal a hruai thleng tawh bawk a, Greek club Olympiakos nen final luh hi an inchuh dawn - Emery hian Villa hi Champions League hruai thlen bakah, European football-a nomawi chawipuina chance a nei.

Villa chairman Nassef Sawiris chuan, "English Football League dintu zinga mi Aston Villa hian kum 150 kan tling mai dawn a, hmana kan ropuina ang kha kan neih let theih nan Unai hi kan thlawp zel dawn a ni," a ti.

Kum 52 mi Emery hian Sevilla chu season thum chu a zawnin Europa League champion a lo nihpui tawh a, kum 2019 khan Arsenal chu final hruai thlengin, kum 2021-ah Villarreal a champion pui bawk.

Emery hian Villa a enkawl hnuah point 115 hlawh chhuak tawhin, Premier League-a Villa a enkawl hnua point hmuh tam lama a tluk loh chu Manchester City, Arsenal leh Liverpool chiah an ni a, league match 59-ah vawi 35 chakpuiin, match khata point 1.95 zel hlawh chhuak ang a ni a, Premier League awm hnua Villa manager zinga chawhruala point hlawh chhuak ṭha ber a ni.