Silly Point : IHI! & AWHAW!

Tata Indian Premier League 2024 ( IPL 17) group stage chanve chu kan lo zo fel leh ta der mai. Che ṭha tura rin kai deuh deuh, che nawi riau an awm a, hriat ngai lem loh sakhming rawn lar thar an awm bawk.

Team mangang an awm ṭan a, 'min dal zo reng an awm lo' ti ni awm fahrana team hawi cham an awm bawk. Engkim hi a awmin, a thleng vel vek a ni ber mai e.

Batter-te vanram

Kumin IPL a titi ti tam ber chu team tin batting a turu lutuk hi a ni a, six leh four hi a sur hian a sur a ni ringawt mai. Pace bowler-ten bouncer pahnih vawm an phalsak pawn awmzia a nei vak lo a la nih hmel?

Chutah tak chuan Sunriser Hyderabad leh KKR ten T20 a bat dan style thar an rawn hmu chhuak kan ti lo thei lo ang. Ni 23 Ṭau thla zan thlenga inkhel 39 kan hmuh tawhah, kumin batting average chu 9.53 a ni hem mai a, he tum 17 zet IPL kan lo hmachhawn tawh chhunga a la san filawr lak ṭum a ni hial awm e.

Kumin IPL a Power Play hmang thiam team Sunrisers Hyderabad lamin IPL history-a team score sang ber pahnih record an rawn siam der mai. Mumbai Indians laka run 277 an vuak chhuah hnu ni rei loteah, a aia pui zawk Royal Challengers Bangalore lakah run 287 an han vaw chhuak leh tehreng a ni kha. Run 300 hi T20-ah hian kan la hmu thuai dawn a ang!

Bowler-te luaithlinulna

Team tin mai batting a ṭhat em em mai vangin, bowler-te tan khaw hawina leh bihrukna tur a vang sawt em em mai a. Hetah tak hian Rajasthan Royals captain Sanju Samson a "improvised & innovative" plan a hmuhnawm. Bowler-te spell pe hman mang loin, an tumpui batsman-te over tin deuhthaw bowling chi hrang hrang a hmachhawn tir ngamna zar an zo.

Tun IPL a run la vaw chhuak hnem ber Virat Kohli-a ten, an team tan runs tamtak vaw chhuak mahse, bowling lamah an che thei thlawt lo. An bowling department lam dawl zawrin an zawr a, 'idea' nei tawh lo ang maia an hrilh hai avangin league dawhkanah pawh a mawngphahah an awm phah hial.

A riruang tur a lang ṭan

Group stage chawhnu lam kan lo kai ṭan a. Top 4 knockout stage inchuh tur awm anga lang deuhte chu an hlimthla kan hmu thei ṭan ruai ruai a. Chutihrual chuan inkhel round hnih khat lekah engkim la inthlak danglam thei erawh a ni.

Khua a ṭhalin boruak a ro rei ta bawk a, stadium tin pitch pawh a ro ve hret hret turah ngai ila, bowlers lam te pawn advantage chhe te te an nei ve ṭan ṭan turah ngai ila. Cricket tournament ropui IPL chu in hawp bawk ila, chawm zel mai ang aw.

Tunah hrih chuan overs apiangin Ihi! leh Awhaw! tiin kan ti tuarh tuarh reng mai a nih hi maw...