Hunthar lakah TNT an chak lo

Ather Pro Volleyball Leaague chu khelh ṭan a ni ta a, champion lai Thutak Nunpuitu Team an chak lo. Season hmasa final-a chak lo zawk Hunthar chuan TNT hi 25-21, 25-22, 25-21 (3-0) a hnehin inelna bul an ṭan fuh hle.

LPS Arena, Falkland Vengah entu an pungkhawm hnem nghal a, inkhel hmuhnawm chhawp chhuah a ni. Inkhel ṭan hmain Hunthar coach VL Malsawma Renthlei chuan inbuatsaihna an neih ṭhat thu Vanglaini a hrilh, a sawi ang ngeiin an inbuatsaih ṭha tih a chiang.

PVL tawnhriat nei tawh, season hmasa lama Tuipuiral tana khel Anurag Rawat an nei tawh a, ani hian point 22 hlap chhuakin a team a chak pui a, a club thar atan a match hmasa berah Kuriz Player of the Match atan thlan a ni.

Huntharin tun ṭum Pro Volleyball-ah team an siksawi nasa a, captain Remsangzuala leh Lalnunfela tih loh Mizo player hriat hlawhte an chhuak a, Fabian Lallunghnema la lutin player naupang zawk tan hmun an siamsak.

Season hmasa PVL champion TNT team kha Mizoram volleyball chanchina hriat zui tur leh boruak nei lian an ni a, coach Lalhmangaihsanga Sailo chuan player neih belh leh hloh nei lovin khelmual a luhpui.

Mahse, 2019 champion Chhinga Veng Spikers leh 2022 champion Durtlang North hnung zuiin champion lai ni chhunga Pro Volleyball an khelh hmasak berah chiang takin an tlawm a, bul an ṭan fuh lohna hi an siamṭha thei ang em tih chu Mizo mipuiten an lo thlir ang.

Hunthar tan Pro Volleyball-a tawn hriat nei tawh Anurag chuan nuam ti takin a khel nghal a, hlap tla zawnin set khatnaah 22-17-in hma an hruai. Ṭum hnih a vuak kai zawn loh hnuah 21-24-in TNT-in hnaih ve leh mah se harsatna awm loin an tlang.

Set hnihna tir lamah champion laiin tan hmun siam remin 8-6-in an sang a, an tawn san lai ber niin an tlo rei lo. Anurag-a bakah Fabian-a leh mi thar Wilson Lalremruata'n Hunthar tan point 10 ve ve thawk chhuakin derthawng lo in set thum an la zawn a, a umtu zawkah TNT an ṭang tluan.

Inelna ṭan hmain coach Hmaa'n damlohnain player a tihbuai avangin TNT-in kim thlapa inpuahchahna hun an nei tam lo tih a sawi. Valbuanga thlawptu Dinchhunga leh Zosangzuala'n point ruk ve ve hlawhin tute mahin season liam taa an khelh dan an pha lo, team pum puiin hmasawn an mamawh tih chiang takin a lang.

April 30, Thawhlehniah insiamṭhat tumin TNT an inlan leh dawn a, tun dinhmuna player nei ṭha Tuichangral nen an intawng ang. Huntharin hmabak pawimawh an hlen hnuah rin an hlawh nghal a, May 2, Ninganiah Chhinga Veng nen an inkhel dawn a ni.

Zanin dar 8:00 hian a hmun ngaiah inkhel a awm leh dawn, team ṭha Durtlang North leh veng anga volleyball thiam Hlimen te an inhmachhawn dawn a, inkhel hmuhnawm a beisei ngam ang.