An sawi zui duh dan kha a zahthlak - Ten Hag

Manchester United-in FA Cup semifinal-ah Coventry City penalty shootout hmangin an hneh a, 3-0 a hma an hruai tawh hnua an insut zawttir vek avangin inkhelh banah chak mah se an sawisel nasa hle.

Erik Ten Hag-a'n press conference a hmachhawn ṭumin, hemi chungchang hi a an zawt nawn. "Ininkhel an sawi zui danah chuan chak lo ang mai in ni a, kha inkhel chungchangah sawi zui duh i nei em?" tiin zawhna an zawt.

Man United boss Ten Hag chuan, "Nei lo. Tuna thil thlen dan hi insiam chawp vek a ni. Zawhna in sawh duh dan leh insawi zui duh dan hi a zahthlak. Football-ah chuan result a pawimawh ber a, final kan lut. Kan inkhel chauh ni loin inkhel dangah pawh result a pawimawh zawk.

"Ni e, 3-0 in hma kan hruai a, 3-1, 3-2, 3-3 a nih hnuah penalty hmangin kan chak a, kan vannei tih chu zep tur a ni lo. Mahse, final kan thleng alawm. Kum hnih chhungin vawi hnih final kan thleng a, hlawhtlinna a ni. Manager ka nihna angah phei chuan kum li chhungin vawi li final ka lut," tiin a chhanglet.

Ten Hag hian Man United a enkawl hma hian Ajax a enkawl a, United a zawm hma season pahnihah KNVB Cup final lut ve vein a hmasa zawkah a champion pui. Dutch manager hian season hnuhnung paliah cup final a lut vek a, a record hi a ṭha hle. Nizan khan Manchester Untied-in Sheffield United an mikhual a, result kan hre hman lo.

English club ropui Man United pawh hi FA Cup-ah kum zawnin final an lut meuh lo. Final an luh zawn ṭum chu 1957 leh 1958; 1976 leh 1977; 1994, 1995 leh 1996; 2004 leh 2005 te kha a ni.