Leicester an lo kir leh tawh dawn e!

Premier League ngainatuten Leicester City an ngai rei hman lo - season hmasa lawka relegate Foxes hi English top flight league-a kir thei dinhmunah an ding mek a, an hmabak match hnihah vawi khat an chak pawhin season tharah Premier League an khel chiang ang.

Foxes hian Thawhlehni zan khan an elpui Southampton chu 5-0 ngawtin an sawp a, Abdul Fatawu chuan hattrick siamin, Wilfred Ndidi leh Jamie Vardy ten goal khat ve ve an khung bawk a, Premier League club tur chi an ni tih an pholang.

Leicester tana hattrick siamtu Fatawu hi kum 20 mi niin, Sporting Lisbon aṭanga loan-a an hawh lai a ni - Ghana tan vawi 17 inlan tawhin, tun season-ah league match 38 khela goal ruk khungin, assist vawi 12 a nei tawh.

Hetihlai hian Foxes-in Premier League nomawi an chawi ṭuma an 'star' player, European club liante sawmna hnara Foxes tana rinawm thlangtu Vardy chu Leicester tana goal khung khawl a la ni reng. English striker hian tun season-ah league match 33 khela goal 16 khungin, assist vawi hnih a nei a, Championship-ah pawh striker 'hot' ber pawl a la ni zel.

Foxes laka tlawm Saints-in pahnihna niin automatic promotion hmuhna chance la nei mah se, thilmak a thlen a ngai tawh - an chunga awm Leeds United leh Ipswich Town hi an hmabak match-ah chak lo vek pawh ni se, goal difference-ah team pahnih an thlau hret a, an tan beisei a bo tawh, tiin a sawi theih.

Leicester hi an hmabak match an khelh hmain Premier League an inpetkai thei bawk. Zirtawpni zan dar 12:30-ah Leeds United chuan Queen Park Rangers an lenchilh dawn a, he inkhelah hian Leeds an tlawm chuan Foxes hi pahnihna aia hniamah an tla thei tawh dawn lo - Premier League khel turin an tling chiang ang.

Foxes manager Enzo Maresca chuan, "Thil lawmawm tak chu Premier League kan hnaih ta zel hi a ni a, vawi khat chak chiah a ngai ta. Kan match khelh leh hmasak bera Preston North End kan hmachhawn hunah kan hna hi chu kan hlen mai ka beisei," a ti a, Premier League inpetkai vat a duh - Foxes an lo kir ngei dawn e!