A hming chu Lallianzuala Chhangte

Nilaini zan a ni a, Indian football-a match ropui ber pawl leh hmuhnawm tak chu a tawp a, thlalatuten mi pakhat lam hawiin an camera an tin ṭhup - television lama live-a inkhel pe chhuaktute pawh an bang chuang lo.

Television-ah chuan Mizo tlangval a lo lang a, van lam hawiin a kut a phar chhuak a, a ṭawng mawlh mawlh a, a ṭawngṭai a ni tih hrilh nawn kan ngai lo - a hming chu Lallianzuala Chhangte a ni a, amah chu Indian football-a lal thar piang meka chu a ni.

Indian Super League semifinal first leg-ah Mumbai City chuan 3-2 in FC Goa an hneh a, India rama infiamna lam ziaktute chuan Lianzuala chanchin lo chu sawi tur an hre lo! A chhan maw? Minute 90 hnuah goal hnih khungin a team a 'comeback' pui tlat alawm.

FC Goa hian an mualah Boris Singh leh Brandon Fernandes-a goal hmangin 2-0 in hma an hruai hman a, mahse, minute 90 hnuah Lallianzuala Chhangte chuan goal hnih khungin, Vikram Pratap Singh chuan goal khat a thawh ve bawk.

Mumbai an nguai

Khualmuala khel hmasa an nih avangin Mumbai tan chak a pawimawh a, Goa khelmuala an chak chuan inringtawk takin Goan club an mikhual thei dawn. Mahse, Mumbai club an inring hman lo a, minute 16-na lekah goal an chhuah nghal.

Mehtab Singh chuan anmahni lama ball thlawh luh a la sual a, hemi changtu Mohammad Yasir chuan ṭha taka a tlan luhpui hnuin Boris Singh tan a siamsak a, Manipur tlangval hian hnai set sawtah goal-ah a chantir.

Mumbai tan Thaer Krouma leh Rahul Bheke ten si phurh sutna remchang nei mah se, an chhawr lo a, Goa tan Noah Sadaoui chuan a hun duhawm a chhawr thei bik lo. Mahse, second half ṭantirah Goa lam bawkin goal an khung.

Goa fapa rangkachak Brandon Fernandes chuan player thiam bik a ni tih pholangin, penalty box pawn aṭangin mawi zetin a khung a, Mumbai an hawihai a, Lianzuala leh a ṭhiante an reh tlawk tlawk.

A tawpah a changtupa

"A tirah a changtupa an che ṭha ngai lo" tih zawng zawng chu a tak ram chantir a ni a, Lallianzuala Chhangte hun a inher chhuak. Minute 90-na a ni a, bench aṭanga luhtir Jayesh Rane chuan ṭha lutukin Lza tan a siamsak.

Aizawl FC midfielder hlui Rane ball pek um lutin Lza a dawk zawk a, 'Mizo Flash' hming lem an pek hian goal-ah a chantir zui. Lunglei tlangval Lianzuala'n a goal khung a lawm hman lo a, hmanhmawh takin a tlan let.

Mumbai an phur laklawh. Minute khat pawh a liam hmain Gurkirat Singh-a shot chu Goa keeper Dheeraj Singh-a'n dang mah se, a per lehlam chu Vikram chuan chiang zetin goal-ah a chantir a, 2-2 a ni.

A la tawk zo lo cheu. Hun pek belh minute rukna a ni a, Rane leh Lza bawk kan hmu. Rane hian ṭha zetin Lianzuala hi a vawi hnih nan a siamsak a, Lunglei tlangvalin goal-a chantir turin harsatna a nei lo - minute 90 hnuah Mumbai-in goal thum an khung a, 3-2 in an chak daih!

Pathian vang

Lallianzuala Chhangtein ropuina a chanin lam hmasak ber a nei ṭhin a, chu chu Pathian a ni. Lza chuan, "Pathian malsawmna liau liau a ni. Goal hnih kan chhuah kha chuan ka hnual ve khawp mai.

"Mahse, beidawng lovin kan nawr chhunzawm zel a, goal khat kan thun hnu kha chuan kan thun leh ang tih ka ring tawp," tiin Vanglaini a hrilh a, beidawng loa an beih rah an seng thu a sawi.

Hetihrual hian Lianzuala hi a ṭawng uang duh lo. Mumbai forward chuan, "Engmah thil chiang a la awm lo. Kan chak avangin kan dinhmun chu a ṭha ngei a, mahse, thlamuang taka awm hun erawh a la ni lo," a ti a, April 29, Thawhṭanni zanah second leg khel turin Goa an mikhual ve leh ang.

Lianzuala'n Pathian hming a lam hmasa ber a, a tawpa a lam pawh Pathian tho a ni. Mizo Flash chuan, "Pathian zarah ka tum ang ngeiin ka che a, ka lawm khawp mai. Mahse, heng zawng zawng hi Pathian vang a ni tih chiang takin ka hria," a ti.

Lianzuala ropuina

Season hmasa ISL-ah Lianzuala'n match 22 khelin goal 10 a khung a, assist vawi ruk a nei. Tun season-ah beisei angin Lza a che lawk lo a, ISL hero of the league ni lai hian season hmasa a phak loh rinna a lian hman hle.

Mahse, Lianzuala hian, "Game pawimawh tak tak a la awm a, team tana danglamna thlentu nih ngei ka tum," tiin Vanglaini a hrilh a, a sawi ang ngeiin danglamna a thlen chho.

League match tawp berah chak zo ta lo mah se, Mohun Bagan lakah goal a khung a, semifinal match pawimawh lutukah goal hnih a khung leh ta - tun season-a league match 23 a khelh aṭangin Lza hian goal kua a khung leh ta der a, assist vawi ruk a nei bawk.

ISL nomawi an chawi a nih ngat chuan hero of the league a zawna nihna chance a sang hle. Nilaini zanah hian Lza bakah Lalengmawia Ralte (Apuia) chuan inkhel bul a ṭan a, Hmingthanmawia Ralte (Valpuia) chu minute 13-naah bench aṭangin a lut thung.