Tlai dar 2:00-ah Women's League final : Mizo Football News Vs Kulikawn FC

MFA Women's League final chu vawiin tlai dar 2:00 hian Lammualah Mizo Football News leh Kulikawn FC ten an khel dawn. League round-ah Laipuitlang club Mizo Football News hian Kulikawn hi 3-0 in an hneh a, pakhatna dinhmun hauhtu an nih bawk avangin champion tura rinkai zawk an ni ang.

MFN hi tun hnai kum 10 chhunga Mizorama record nei ṭha ber Lalsangzuala Hmar enkawl a ni a, Melthum pa hian champion dan a hria tih chu MPL, I Day Football, MFA Cup leh MFA Super Cup hmang tein a lo lantir tawh.

Mizoram chhunga hmeichhe football-a inelna sang ber MFA Women's League hi Sanga'n sulhnu tih ṭhat belh nan hman a duh ang. MFN hian hmeichhe football-a player langsar Grace Lalrampari, Lalthansangi, Cindy Remruatpuii, Lalhruaizeli Khiangte leh Lalduhthlani te an kawl a, champion turin an inringtawk khawp ang.

Thansangi hian tun inelnaah goal 11 a khung tawh a, MFN chakna kawngah a thawh hlawk hle. Chutihrualin Grace-i erawh hliam vangin a la inlan tam lo a, final-ah pawh a khelh theih a rinawm lo zawk.

FC Kulikawn hi coach David Tluanga enkawl a ni a, tualchhung football hrechiangtu a ni. David hi coach langsar a ni lo a, chutihrualin MPL team coaching staff bakah MPL Under 18 leh grassroots lamah te tawnhriat a nei ṭha.

League round-ah Kulikawn hian 1215'S chu 2-1 in an hneh lo a, semifinal-ah erawh penalty hmangin an hneh thung. MFN coach Sanga chuan, "Semifinal ka en a, Kulikawn khelh an harsa dawn tih kan hmu. Captain Angela-i hoa chak tumin an khel a, ball an hloh apiangin goal venhim hna an thawk ṭha a, kan dinhmun ṭhat zawkna ka hmu lo," tiin Vanglaini a hrilh.

Kulikawn tan Lalrinmuani leh Lalthantluang Hrangkhol te an pawimawh a, Rinmuani 'n goal kua a khung tawh a, MFN tan ven uluk a ṭul ang. Coach David-a hote hian MFN hi penalty shootout an hruai thleng thei a nih chuan, semifinal-ah penalty shootout hmangin 1215'S an hneh a, inrintawkna an ngah zawk tawh ang.