Champion châk lo Liverpool an tlawm

Jurgen Klopp-a merseyside derby hnuhnung berah Liverpool an tlawm a, Everton-in 2-0 in an hneh. Liverpool champion beiseina a thamral, tiin a sawi theih a, Premier League inhamtan tum Everton beiseina a nung thar thung.

Everton tan Jarrad Branthwaite leh Dominic Calvert-Lewin ten goal khat ve ve an khung a, hun tawp thlenga goal dang a luh loh avangin Everton an chak a, Goodison Park-ah rin hlawh lo zawk team-in point thum an hlawh chhuak.

Liverpool an tlawm avangin league nomawi a hla ta sawt a, hmahruaitu Arsenal an phak lohna chu point thum a ni a, match li chiah khelh tur a awm tawh - he thuziak i chhiar meuh chuan pathumnaah an tla thla tawh hial mai thei.

Nizan khan Manchester City an inlan a, Brighton & Hove Albion an lenchilh. Result kan hre hman lo a, City hi an chak chuan Liverpool an lehpel ang - Jurgen Klopp-a'n Anfield-a a season tawp berah League Cup nomawi bak a chawi dawn lo niin a lang ta.

A har a ni

Everton leh Liverpool inkhel an ni miau a, mi tam zawkin Jurgen Klopp-a naute chu hnehna chang chiang saah an dah. Mahse, an beisei ang ngawt chuan thil a kal bik lo - Everton an ṭang khawng tlat a, Reds an nawr na viau bawk.

Goodison Park-a'n Everton boss Sean Dyche-a'n 4-4-1-1 hmangin a naute a remkhawm a, Liverpool tan hmun awl siam a tum lo tih chiang takin a pholang - an goal nawr a na viau bawk a, tun season-a Everton khelh dan nen a inhmeh lo zawk mah!

Minute 27-naah Everton hian goal an khung nghal a, Reds tlarhnung buai nuai karah Branthwaite chuan remchang hmuin goal hmahruai a khung. Mahse, Liverpool an ni miau a, si phurh sut leh mai beiseina nen Kop an beidawng lo.

Mahse, tun season-a Liverpool buaina pakhat chu chance an neih pawh an chhawr thei lo ṭhin chu a ni a, Everton lakah an thawnthu duhawm lo hi an her danglam thei chuang lo - goal khung an harsat.

A chiang e

Goal dang lut loin chawlhlawk hman a ni a, Liverpool an hriam sawt tura ngaih ni mah se, an insiamṭha lo. Minute 58-naah Everton zawkin an khung leh a, khel ṭha em em mai Dominic Calvert-Lewin chuan Dwight McNeil-a corner aṭanga ball kal chu a tauh lut.

Goodison Park-ah Everton fans thawm a ring a, an demawm lo - Merseyside derby-a hnehna hla an sak loh chin a rei tawh a, an hmelma kumhlun laka 2-0 a an chak hi lawmna tawpkhawk a tling.

Liverpool tan Darwin Nunez, Luis Diaz leh Andy Robertson ten chance nei vek mah se an chhawr lo a, rintlak ni reng ṭhin Mohamed Salah meuh pawh a rintlak lo a, Fulham laka goal a khung avanga fan-ten an lawm em em Diogo Jota lah hliam vangin kar hnih a chawl dawn zui.

A tawpah Liverpool an tlawm a, point thum an hloh a ni satliah lo a, nomawi an mangṭha tel, tiin a sawi theih. Everton fan-ten, "Goodison Park-ah league nomawi in thlauh e," tih hla sa chungin Liverpool fans an tihel a, Kop hoin an theihnghilh lawk lo ang - an bengah a cham rei dawn.

Champion duh lo!

Liverpool captain Virgil van Dijk chu a ṭhiante khelh danah a lawm lo a, Dutch defender chuan, "Champion hi an châk tak tak em le?" tiin a ṭhiante chu champion tum rilru pu loah a puh a, a lungawi lo hle tih a lang.

VVD chuan sawi zawmin, "Hetianga khelh a, ball chhuh let thei bawk si lo, freekick chawi reng rikngawt bawk si chuan eng tin nge maw nomawi kan chawi ang le? Ka lawm lo takzet. Kan zavaia kan inenfiah a, kan theihna zawng zawng kan hlan leh hlan loh inzawh nawn a ngai," a ti a, player-ten inenfiah an mamawh thu a sawi.

Klopp chuan fan-te hnenah ngaihdam dilin, "Kan khel ṭha lo a, fan-te rilru tur ka hrethiam a, ngaihdam ka dil a ni. Derby record hi min hrilh fo ṭhin a, an duh ang result kan pe thei si lo. A pawi ka ti takzet," a ti.

German coach chuan nomawi chungchang sawi zawmin, "Manchester City leh Arsenal hi chesual vek pawh ni se, zanina kan khelh anga kan khelh chuan engmah a danglam chuang lo ang. Hei aia ṭha zawka kan khelh a ngai a ni mai," a ti a, an result a chhuang lo hle.