Sheffield lakah Man United an 'comeback'

Manchester United-in FA Cup final an luh hnua a match hmasa berah Sheffield United 4-2 in an hneh. Old Trafford-a inkhelah hian Erik Ten Hag-a hote awlsam takin an chak lo - mikhual team-in ṭum hnih ngawt hma an hruai.

April 24, Nilaini zan inkhelah Blades tan Jayden Bogle leh Ben Brereton Diaz ten goal an khung a, mualneitu lamin Harry Maguire leh Bruno Fernandes penalty hmangin an sut. Man United captain Fernandes-a'n hla tak aṭangin mawi zetin hmahruaina goal a khung a, Rasmus Hojlund-a'n chak nemnghehna a khung leh bawk.

Tlarhnung pawp

Man United-in defence laiah Maguire chauh player dam ṭha an nei a, Casemiro nen an inkawp. Goal an chhuahna tak erawh Andre Onana tihsual vang a ni a, minute 35-naah United keeper hian Diogo Dalot ball pek tumin, Bogle a rawn inrawlh hman a, ṭha zetin a pet goal.

Sheffield goal hnihna hi second half-a lut a ni a, minute 50-naah Ben Osborn ball pek chu Brereton-a'n ṭha zetin a pet lut. Blades-in goal an khung hian box chhungah keeper chhiar tel loin United player pakua an awm a, Sheffield player panga awmin player ven loh pahnih an awm. Brereton hian vengtu a neih lohna hi remchangah lain chiang takin a pet lut.

Man United hi hliam vangin tlarhnungah an buai a, chutihrualin goal 50 tehmeuh tun season-ah an chhuah avangin player inhliam ringawt mawhpuh theih an ni lo.

Hartharna chang Maguire

Man United-in FA Cup final an thlen theih nan Maguire a khel ṭha a, inkhelh zawhah Coventry player-te hnem tura khingpuite lam a pan nghal avangin fak a hlawh. Tun hnaia an fak mek Maguire hi season tir lama nasat taka an sawisel kha a ni a, Ten Hag-a'n captain nihna hlihsakin, United pawhin chhuahtir tum mah se a chhuak duh lo.

Tunah erawh United tan Maguire a ṭangkai ṭhin hle. A club hlui Sheffield United lakah Maguire hian Alejandro Garnacho cross chu minute 42-naah ṭha zetin a tauh lut a, striker ṭha tauh luh atana mawi a ni.

Second half-ah Maguire hian penalty a hlawh chhuak leh a, Fernandes-a'n minute 61-naah cool zetin a pet lut. Man United-in chak tumin an nawr chhunawm a, minute 81-naah Kobbie Mainoo pass chu Fernandes-a'n changin, goal aṭangin la hla mah se United captain kawh zetin goal kilah a pet lut.

United lawm tikim turin minute 85-naah Fernandes-a ball pek chu Hojlund-a'n a khung leh bawk. Ten Hag-a hoten 4-2 in hnehna an chang a, point thum hlu tak hlawh chhuakin chhiarkawp danin UCL khelh beiseina la nei mah se a tak ram erawh a thlen theih a rinawm tawh lo.

Ten Hag Out?

FA Cup final an thlen zawhah Ten Hag ban duhtu an ṭhahnem a, Sheffield Untied an hneh zawhah erawh boruak a dang leh daih. Blades an hneh ṭum hian Ten Hag-a'n substitution a tisual tawh lo.

Mual sira nung tawk lo Antony chu minute 55-na lekah Amad Diallo hmangin a thlak a, Christian Eriksen-a'n pressure a pek ṭhat tawk loh avangin tlan taima zawk Scott McTominay chu minute 64-naah a luhtir. Garnacho-a'n a khel tluan tawh a, chak thei dinhmuna an din hnuah chauh Mainoo a la chhuak.

Ten Hag hote hian ball possession 72% zet an neih bakah vawi 730 pass an nei a, Blades hian vawi 292 chauh ball an in pass. United-in harsa takin hnehna chang mah se inkhel an thunun a, Ten Hag-a'n season tawp lam a hmang ṭha a nih chuan Man United manager nih zel theihna kawng a la inhawngah a ngaih theih.

Blades an hneh ṭum hian Ten Hag hian U18 Premier League Cup-a Man United champion puitu forward Ethan Wheatley chu bench aṭangin a luhtir bawk. Kum 1937 aṭang khan Man United squad-ah hian academy player an la awm ziah a ni.