Mbappe leh PSG tan nomawi a hnai takzet ta!
Paris Saint Germain chuan Ligue 1 nomawi an chawi leh ngei dawn tiin a sawi ngam ta, an khelh hmabakah vawi khat lek pawh an chak leh a nih chuan midang result ngaihchan tel ngai loin an champion ang.
French champion hian Nilaini zan khan Lorient chu 4-1 in an hneh, inkhel angah AS Monaco khan point hloh ṭhen se la chuan Luis Enrique naute hi champin nghal thei an ni, mahse Monaco an chak avangin match khat dang nghah leh rih a ngai.
Mbappe leh Dembele
Paris saint Germain tan Kylian Mbappe leh Ousmane Dembele ten goal hnih ve ve an khung a, goal mawi leh hmuhnawm a nih avangin an goal khung hian social media lamah sawi zui a hlawh hle.
Barcelona forward hlui Dembele-a'n ball tlan puiin box hrulah a keng tlang a, midang a pe mai dawn emaw tih laiin goal kilah a thlawh lut, chawlhlawk laiin Mbappe goal kan hmu zui - Nuno Memdes siamsak chu rang takin a lo keng lut zauh, a mawi tak tak a ni.
Second half-ah Dembele goal kan hmu leh, awmhmun aṭangin a lo pet lut. Goal khung chu a harsa lo, mahse a siamsaktu Mbappe chet dan erawh a hmuhnawm, mual sirah amah vengtu a chhaih buai a, midangin an rawn bawr dawnah a kapkarah thun sakin a Dembele tan a siamsak.
Hun tawp dawnah Mbappe hian a thiam dan takin box sir lamah ball a lalut a, amah vengtu rawn hnai deuh mah se bum zauhin goal lamah na takin a pet, keeper Yvon Mvogo tan dan theih a ni lo, chiang takin an goal lina leh a hnuhnung ber a lut.
Nomawi pali
Kylian Mabppe-a'n tun season tawp rualin PSG tana a contract a hmang zo dawn a, tun dinhmunah chuan pawhsei tumna a la nei lo. Paris club coach Luis Enrique chuan Mbappe chu cham thei a la nih thu a sawi zaih tawh, chumi tur chuan nomawi pali chawi a duh bawk.
Enrique chuan, "French Super Cup kan la tawh a, French Cup final pawh Lyon nen kan khel dawn," a ti. Ligue 1 nomawi chu an chawi tluk a ni tawh a, inelna lian Champions League semifinal an lut tawh bawk, title pali la thei dinhmunah an ding.
PSG coach Enrique chuan, "Inelna pakhat chauh kan ngaihtuah thei lo, pawimawh tak tak dang khelh tur kan nei, chuvangin inkhel tur player thlan chungchangah pawh thutlukna siam fimkhur a ngai hle, tumah pawimawh bik leh pawimawh lo bik an awm thei lo," a ti.
Inrinni zan hian Paris khawpuiah Le Havre an lo mikhual dawn a, an khingpui tur hi table mawng lama talbuai lai an nih avangin champion an nemngheh a rinawm. Parc des Princes-ah ngei champion an lawm thei ang.