Juve hmachhawn tur Atalanta

Atalanta chuan an mikhual Fiorentina 4-1 in an hneh a, inkhel pahnih belh khawmah 4-2 a tlangin Coppa Italia final an lut - semifinal lehlama hnehna changtu Juventus nen nomawi an inchuh dawn a ni.

An intawn hmasakah Fiorentina hi si khat faiin an chak. Nilaini zan Atalanta mualah inkhelah Teun Koopmeiners-a'n si phurh a sut bakah Gianluca Scamacca chuan hma hruaina a khung.

Mikhual lamin Lucas Martinez Quarta hmangin an sut ve leh a, aggregate-ah 2-2 a ni chiah. Injury time-ah Atalanta hian Ademola Lookman leh Mario Pasalic ten an khung belh a, an tum ram an thleng ta zawk a ni.

Atalanta hian Liverpool hnehin Europa League semifinal an lut tawh bawk a, tunah Coppa Italia final an luh leh tak avangin tun season chu nomawi pahnih chawi thei dinhmunah an ding mek.