Clay-ah Osaka a chak

Naomi Osaka chuan tun hnai kum hnih chhunga a vawi khat nan clay court-ah hnehna a chang, a khingpui Greet Minnen chu 6-4, 6-1 a hnehin Madrid Open second round a inhlangkai.

Japanese star Osaka hi hard court-a inkhel thiam a ni a, a vanglai pawhin clay court-a inkhelh hi chu a harsat ṭhin. Fa a neih hnuah a intuaithar leh mek a, inelna lian French Open khelh tumin a inbuatsaih mek.

Kum 26 mi Osaka chuan, "Tun hmain clay-ah hian sulhnu ṭha lo tak tak ka nei tawh ṭhin, ṭha leh hlauhawm taka match khelh hi ka nei ngai meuh lo, tun ṭumah erawh boruak a danglam hlein ka hria," a ti.

Nilaini zan Arantxa Sanchez stadium-a inkhelah, world number 1 hlui Osaka hian a service ṭha tak ang kha a nei thei leh tawh a, hnehna chang tur hian darkar khat leh minute 19 bak a mamawh lo hial.

Inkhel dangah US Open champion hlui Emma Raducanu erawh a chak lo. Britain nula Raducanu hian Argentine nula Maria Lourdes Carle chu 6-2, 6-2 in a hneh lo, darkar khat leh minute 25 chhungin a chak lo fel hman tihna a ni.

US Open 2016 champion Sloane Stephens erawh a khel ṭha viau. Clay court bika a zawna vawi ruk a chakna ni turin Stephens hian Italian nula Martina Trevisan chu 6-3, 5-7, 6-4 in a hneh lo.

Tualchhung nula, tun hma lama world number 2 pawh lo ni tawh Paula Badosa lakah beiseina sang viau mah se a chak lo. Spanish nula hi 2-6, 6-3, 6-3 in Jessica Bouzas Maneiro lakah a tlawm a, a zinkawng a tawp nghal.