Serkawn lakah Diakkawn chungnung

Ather Pro Volleyball League 2024 khelh mek a ni a, hmeichhe inelna match hmasa ber chu Nilaini zan khan khelh niin Diakkawn chuan an khingpui Serkawn chu 15-8, 15-7, 15-8, 17-15, 15-11 (5-0) in an hneh.

Kuminah hian hmeichhe inelna kalphung tih danglam hret a ni a, game point chu 15 niin set nga an khelh ziah a ngai dawn thung. Set khat lakah point khat zel an hmu a, Diakkawnin point nga an hlawh chhuak a ni.

LPS Arena, Falkland-a inkhelah Vardingliani leh Lalmuanpuii'n point 32 thawk chhuakin Diakkawnin ṭha takin bul an tan. Fa a neih hnua kir leh Dingi'n point 16 hmuin vawi khat chiah a tisual a, Kuriz Player of the Match atan an thlang.

Dingi kawppui Muani'n point 16 tho hlawh chhuakin point ruk a paih a, Kolasib team-in set nga an lak fai vek avangin point nga an hmu nghal.

Serkawn tan kum lama la naupang zinga player hriam tha Elisian Medai leh R. Laltleipuii chuan hmun pawimawh luah mah se set an thawk chhuak zo lo. Elisian chuan point 15 hmuin 10 a hloh a, Tleipuii'n vawi kua vaw tlain point ruk a paih a ni.

Lunglei team-in point hmu lo in bul an ṭan a, April 27-ah Durtlang nen an inkhel leh ang. May 1-ah Diakkawn inlan ve lehin champion lai Luangmual nen an inhmachhawn thung ang.