Celtics barakhaihtu Heat

NBA Eastern Confe-rence playoff khelh laiah, seeded pakhatna Boston Celtics chu nuamsa taka chak tura ngaih ni mah a awlsam bik dawn lo niin a lang, nimin zing khan Boston hi Miami Heat lakah 111-101 in an chak lo.

Game 1 an khelh ṭum khan team ṭha lo leh rinkai lo zawk Heat hi point 20 ngawtin an hniam zawk, mahse game 2-ah erawh thil mak thlen tirin an hneh let, best of seven series khelh turah team pahnih 1-1 in an inhnehtawk mek.

Heat tana point 24 neitu Tyler Herro chuan, "Kan chak lohna aṭanga thawh chhuah kha kan duh vek a, chumi tur chuan theihtawp kan chhuah a ni," a ti a, mimal thawhṭhat vang ni loin an zavaia khelh ṭhat vanga chak an nih thu a sawi bawk a ni.

Herro hian 3-points vawi ruk a vawm lut a, assist ṭum 14 a nei bawk. Heat tana inkhel bul ṭantu player panga ten point 10 an nei tling vek. Bostan tana Jaylen Brown (33 points) leh Jayson Tatum (28) te chet ṭhat a tawk zo lo.

Besy of seven series a nih avangin tlang tur chuan vawi li tal an chak a ngai. April 28, Pathianni zing dar 3:30 hian game 3 an khel leh ang.