Pathianni zanah Odisha dinhmun chinfel a ni dawn

Indian Super League hmawr bawk a hnai ta hle - Pathianni zan dar 7:30 hian Mohun Bagan Super Giant chuan Odisha FC chu semifinal second leg khel turin an mikhual dawn.

Semifinal first leg-ah Odisha hian 2-1 in hnehna an lo chang tawh a, goal thum a luh bakah red card pahnih phawrh a ni bawk - Pathianni zanah pawh inkhel boruak a 'hot' leh dawn tih a chiang.

Mohun Bagan coach Antonio Lopez Habas chuan, "Kolkata-ah kan lehthal a, final kan thlen theih ka beisei," tiin semifinal first leg zawhah khan a sawi a, final luh a tum.

Mahse, Bagan tan chuti maia awlsam erawh a ni dawn bik lo - Odisha boss Sergio Lobera hian kum 2021 khan ISL nomawi chu Mumbai City tan a lo chawi tawh a, league winners' shield an hawn tel bawk. Inkhel boruak sang a ngam.

Mizo telna

Odisha-ah Mizoram player an awm nual a, semifinal first leg-ah pawh Isak Vanlalruatfela, K. Lalṭhathanga (Puitea), Jerry Lalrinzuala leh Jerry Mawihmingthanga ten inkhel bul an ṭan vek a, Mizo player-ten hmun pawimawh an chang!

Tlarhmaah Isaka chu bul ṭan leh chiang tura ngaih a ni a, tun season-a league match 23-a goal li leh assist vawi thum neitu hi Odisha tan player pawimawh a tling phak.

Aizawl FC forward hlui Isaka bakah Puitea leh Jerry Rinzuala te chu bul ṭan leh chiang tura ngaih an ni a, Puitea hian match 22-ah goal khat leh assist vawi khat nei tawhin, tlarhnungah match 22 khel tawh Jerry a rintlak ṭhin viau bawk.

Season dang angin Jerry Mawia'n hmun a chang meuh lo a, mahse, semifinal first leg-ah bul a ṭan. Chanmari tlangvalin bul a ṭan leh ṭan loh hi Lobera-a'n foreign player a rem dan a zir a nih a rinawm.

Odisha an ṭha

Tun season-a goal 13 leh assist vawi thum neitu Roy Krishna chu tlarhmaah bul ṭan chiang tura ngaih a ni a, Bagan tan ani ven hi hna hautak a tling leh ang.

Lobera-a'n 4-2-3-1 a hmang a nih chuan a hmaah Krishna hi mal tlatin a hnungah, Isak, Princeton Rebello leh Jerry Mawia ten an thlawp thei ang. Hei erawh thlak danglam theih a ni - ISL-ah foreign player paliin bul an ṭan phal a ni.

First leg-ah Lobera-a'n tlarhnung laiah foreign player pahnih chhawr a duh avangin Diego Mauricio a dah chhuak a, mahse, tlarhnunga rinrawl Carlos Delgado chuan red card a hmuh avangin Pathianni zanah a inlan thei dawn lo.

Chuti a nih chuan Mourtada Fall dinpui turin Narender Gahlot a lut ang a, Krishna tawlh letin, tlarhmaah Jerry emaw Rebello emaw bench lamah awmin, Mauricio chu tlarhmaah a ding thei. Midfield-ah Ahmed Jahouh chu bul ṭan chiang tura beisei a ni a, Bethlehem Vengthlang tlangval Puitea nen an inkawp leh ang.

Bagan beiseina

Salt Lake Stadium-a inkhel tur an ni a, fans 50,000 chuang chu an pungkhawm dawn chiang. Odisha tan Kolkata club laka hnehna chan nawn a harsa ang tih a chiang a, player an nei ṭha bawk.

Midfield-ah Euro thlenga tawnhriat nei, Finland international Joni Kauko a pawimawh leh dawn a, India international Anirudh Thapa lam hmaih a thiang lo. Bagan-ah hian Lalrinliana Hnamte (Terina) a awm bawk a, game boruak sanga bul ṭan tur erawhin a la nau deuh.

Albania international striker Armando Sadiku chu hrem vangin a inlan thei dawn lo a, tun season-a league goal 10 leh assist vawi sarih neitu Dimitri Petratos leh goal 10 leh assist vawi hnih nei tawh Jason Cummings te an pawimawh ang.

Bagan coach Antonio López hian 2014 leh 2019-20 khan ATK chu league nomawi a lo chawipui tawh a, tun season-ah pawh league winners shield dawng tawhin, ISL nomawi chawi ngei a duh dawn.

Inbuatsaihna ṭha

Odisha forward Isaka chuan, "Semifinal a ni tawh a, inbuatsaihna pawh ngawrh lehzual a ngai a, nomawi chawi ngei duhin tu pawh hian theihtawp kan chhuah vek a ni tawh ber mai.

"Tuna kan thlen chin pawh hi Odisha tan chuan thil thar a ni a, kan thlen chinah kan lawm hle. Chutihrual chuan champion ngei erawh kan tumruh," a ti a, semifinal-a thawnthu tihtawp mai a tum loh thu Vanglaini a hrilh.

Isaka chuan sawi zawmin, "Khualmuala inkhel tur kan ni a, Bagan an ṭang dawn a, engmah sawi lawk theih ka nei lo. Pathian hnenah kan chak ngei ka dil ngai lo a, inhliam loa awm te, keima tawka ṭha taka khelh ve leh team te pawh ṭha taka an khelh hi ka dil chu a ni mai.

"Team pahnihin chak tumin kan bei ve ve dawn a, chak phu zawkin hnehna kan chang mai ang," tiin Vanglaini a hrilh a, Kolkata khawpuiah hnehna hlado chham ngei a tum.