Champion zia neitu Manchester City

Arsenal-in pressure pe ṭha mah se Premier League champion lai Manchester City an buai phah lo. Pep Guardiola hote hian April 25, Ningani zan khan Amex Stadium luahchhuahin mualneitu Brighton chu 4-0 in an sawp.

Man City tan Kevin De Bruyne-a'n goal hmahruai tauh lutin Phil Foden-a'n goal hnih a khung belh a, Julian Alvarez-a'n goal khat a khung belh leh bawk. April 28, Pathianni zan dar 9:00 hian Man City-in Nottingham Forest an hmachhawn lehnghal ang.

An thiam e

Pep-a hoten Amex Stadium-ah ṭan phat aṭangin an thiamzia an pholang a, goal a lut hma dawn tih a chiang nghal. Minute 17-naah dinglam aṭanga Kyle Walker-a cross chu dive chungin De Bruyne-a'n a tauh lut a, Belgian midfielder hian a ke chauh ni loin a lu pawh a hmang thiam.

Tun hnaia che ṭha, Foden-a'n freekick hmangin a thiam thil a pholang. Minute 24-naah box pawnah chiah City-in freekick an hmu a, ball bulah KDB leh Foden te an ding ve ve a, English midfielder zawkin petin, an dan per zarah goal-ah a lut.

Brighton-in goal hnih an chhuah hnuah pawh tlarhnung aṭangin ball in pass chhuah an la tum a, an tisual. Minute 34-naah City-in pressure an pek ṭhat rah sengin Foden-a'n ṭha zetin a pet lut.

Goal lina hi second half-ah a lut a, minute 62-naah Brighton-in City ball in pass chhuak tur an veng a, Ederson-a'n na takin a pet chhuak zawk. Walker-a'n winger ṭha ang maiin ball a lalut a, box chhungah talbuai deuh mah se keeper Jason Steele-a inrawlh hmain tlawh per hmain Alvarez-a'n chiang zetin a pet lut.

Champion tum City?

Man City-in Brighton laka point thum an hmuh avangin match 33-ah point 76 hmuin pahnihnaah an invawrhchho a, hmahruaitu Arsenal chu point khatin la pha lo mah se match khatin an khel tlem zawk.

Pep-a hote hi a zawna a vawi li nana nomawi chawi turin an kutah engkim a awm a, an khingpui an hneh vek chuan an champion dawn. City-in pressure sang an ngam a, an elpui Arsenal aiin an fixtures a hautak lo zawk.

Mahse, hriat reng tur chu, nikum Ferbuary 18 khan Forest khelmual City Ground-ah Man City hian point khat chauh an hlawh chhuak. Tun season-a Eithad Stadium-a an inhmachhawn ṭumah erawh player 10-a khel chungin City hi 2-0 in an chak thung.