MFA Women's League champion Sanga enkawl Mizo Football News

Laipuitlang club Mizo Football News chu MFA Women's League 2024 champion an ni. Nimin khan Mizoram chhunga hmeichhe football inelna sang ber final hi Lammualah khelh a ni a, Kulikawn FC hian goal khung hmasa mah se Lalsangzuala Hmar kaihhruai Mizo Football News-in 2-1 in an lehthal.

Final hmuhnawm takah Lalduhthlani a langsar a, MFN goal hnih hi Lunglei nula khung ve ve a ni. Group stage-ah MFN hian 3-0 ngawtin Kulikawn FC sawp mah se final boruak a dang a, coach David Tluanga'n a naute a fuih ṭha tih a lang bawk.

Minute ngana lekah Kulikawn goal khung khawl Lalrinmuani'n MFN keeper Nupuii rawn chhuak chu hmuin hla tak aṭangin a volley goal a, inkhel a nun phah hle.

MFN-in siphurh sut tumin an nawr na a, Duhthlani'n final-ah a theihna pholangin minute 35-naah freekick aṭangin a khung. Kulikawn tlarhnung phui ṭha zui mah se a tawp an thleng zo lo. Laipuitlang club an vannei a, Duhthlani theihna sang tak a lang tel bawk. Injury time-ah Duhthlani hian ṭha zetin a khalh lut a, champion-na goal a khung zui bawk.

MPL-a champion ngun ber coach Lalsangzuala Hmar-in hmeichhe inelna sang ber MFA Women's League-ah nomawi a chawi. Coach Sanga chuan, "Champion hrim hrim hi a lawmawm. Vengchhung YMA section tournament-ah patling leh patling hmai sen kan inhmuh a, hmeichhe inelna pawh ni se Mizoram puma hmeichhe inelna sang bera kan champion hi ka lawm takzet a ni," tiin Vanglaini a hrilh.

Champion team MFN hian Rs 50,000 an dawng a, pahnihna Kulikawn FC hian Rs 20,000 an dawng. Semifinal-a vanduai SYS A leh 1215's ten Rs 5000 ve ve an dawng bawk. Best Player-ah MFN player pawimawh Lalthansangi thlan a ni a, SYS A forward Lalsangpuii Sailo-in goal 15 khungin top scorer a ni. Lalhmachhuani Memorial FC hnenah fair play award an hlan.

Women's League hi a vawi thumna a ni a, Vakiria FC chu champion hmasa ber niin SYS FC chu a pahnihnaah an champion. Kuminah champion thar an awm a, a hming chu Mizo Football News a ni.