Slot-a'n Liverpool enkawl a duh

Liverpool nena sawizawm mek Feyenoord boss Arne Slot chuan season tharah Merseyside club enkawl a beisei thu a sawi a, Dutch coach hian season tawpa chhuak tur Jurgen Klopp a thlak ngei hmel hle.

Kum 45 mi Slot hian Ningani zana 2-1 a Go Ahead Eagles an hneh zawhah he thu hi sawiin, "Anfield-a thawh ka duh tih hi chu thil chiang sa a ni a, tuna ka sawi theih chu club pahnih an indawr mek, tih hi a ni a, kei chuan an thutlukna ka nghak mek a ni," a ti.

Tottenham Hotspur leh Leeds United nen pawha lo sawizawm tawh Slot chuan Liverpool leh Feyenoord te an inrem theih a beisei thu a sawi a, German coach sulhnu hnutchhiahah huaisen taka pen luh a tum.

Slot hian kum 2016 khan a coaching career zawh ṭan ve chauhin, Dutch club SC Cambuur-ah assistant coach leh manager lailawkte niin hun a hmang a, a hnuah AZ Alkmaar chu assistant coach thoa zawmin, 2019-20 season-ah khan coach puitling atan ruat a ni.

Mahse, AZ-ah hian hnathawk ṭha mah se, Feyenoord nen an lo inbiak avangin AZ hian an ban a, 2021-22 season aṭangin Feyenoord hi a zawm. A season hmasa berah hian Europa Conference League final hruai thleng nghalin, nomawi erawh an chawi ta lo.

Season hmasa khan league-ah champion puiin, tun season-ah KNVB Cup-ah a champion pui leh tawh a, mahse, Netherlands ram pawnah coaching hna a la thawh loh avangin Reds ṭantu tam takin rin ngam an harsat.

Liverpool captain Virgil van Dijk chuan, "A team a khelhtir dan leh a duh dan enin, Liverpool nena inmil tak a ni," tiin an coach thar tur chu a fak.