North London Derby Tottenham mikhual tur Arsenal

Premier League hmahruaitu Arsenal chuan Pathianni zan dar 6:30 hian Tottenham Hotpur an tlawh dawn. North London Derby boruak a sang ziah a, kuminah Gunners hi champion beiseina sang tak nei mek an nih avangin a boruak a sang zualin a rinawm.

Spurs hian season thara Champions League khelh phak an duh a nih chuan tlawm a remchang tawh lo bawk. Chak ngei ngei mamawh team pahnih an ni a, tun hma lama an inhuat tawhna tel lo pawhin an dinhmun thlirin thapui an thawh ve ve a ngai dawn.

Derby Bawk

Arsenal hian London Derby an khel zo chiah a, an chetsual theihna tura ngaih Chelsea chu 5-0 in an sawp. Manchester United defender hlui Gary Neville chuan, "Blues lamah Arsenal khelh dan kha chu sawisel tur lai a awm lo," a ti hial - North London Derby-ah hian tih nawn an tum ang.

Chelsea an hneh ṭum hian, hun tawp dawn lamah player ṭha Thomas Partey, Kai Havertz, Leandro Trossard leh Takehiro Tomiyasu te lakchhuah an ni a, anni ho hian a tir aṭangin Spurs an hmachhawn thei ang. Trossard aiah Gabriel Martinelli hmel kan hmu maithei bawk.

Season chawhnu lam hun pawimawhah Partey a dam chiang a, ani hian Gabriel leh William Saliba te a thlawp ṭha, a hmaah Declan Rice chuan zalenna zau zawk neiin a duh tawkin a tal thei. England midfielder hi Spurs laka danglamna siam thei tur a ni ang.

Mikel Arteta-a'n tlarhma laiah Gabriel Jesus a dah nawn a rinawm tawh rih lo. Brazilan striker hian Aston Villa tlarhnung a nawr na tawk lo a, chuvangin a hman thiam ngai Havertz ho bawhin bul an ṭan a rinawm - Bukayo Saka chu buaipui tham a ni leh ngei bawk dawn.

Arsenal tlarhnung lam chu an ngaihtuahawm lo tura ngaih a ni. Saliba, Gabriel leh Ben White te hi khawih chet thiang lo ang mai an ni a, a sir lehlamah Tomiyasu dah a nih a rinawm a, goal nawr lama pui thei an mamawh a nih chuan Oleksandr Zinchenko an la nei bawk.

Tun season EPL goal chhuah tlem ber Gunners goalkeeper David Raya-a'n goal a chhuah lo leh a nih chuan, khelh hmabak pathum nei chungin Golden Glove a dawng dawn, an hmelma khelmuala hetiang dinhmun luah theih hi a chak zual ngeiin a rinawm.

Fiahna hautak chu

Tottenham hi an match hnuhnung berah an mualpho, an tiatpui Newcastle United lakah 4-0 in an tlawm. An mualphona aṭangin thawh chhuah an tum dawn a, captain Son Heung-min pawhin thapui an thawh tur thu a sawi.

Spurs captain Son-a chuan, "Magpies laka kan khelh dan kha chu pawmzam theih a ni lo, kan khel chhe em em vek - kei pawh ka bang bik lo. Hun rei tak chhung kan awmkhawm tawh a, khatiang tak mai kan khel thut kha chu thil mak tak pawh a ni hial.

"Tunah erawh North London Derby khel turin inbuatsaihna kan nei ṭha, chawlhkar khat chhung ṭha takin kan training leh tawh a ni. Gunners lakah hian tun hmain goal ruk ka khung tawh a, tun ṭumah hian tun hma lam kha chu a pawimawh tawh lo, goal thar khung ka tum ang," a ti.

Arsenal an hmachhawn hnuah Spurs hian Chelsea leh Liverpool te an tlawh zui dawn a, season tawp lama an hmachhawn tur zingah Manchester City an la tel bawk, an hna hi a hautak dawn takzet tih chu a chiang hle.

South Korea international Son chuan, "Ka ngaihdan chuan Arsenal nen kan inkhelh tur hi tun season atana match pawimawh leh lian ber a ni hial. Kan tan chuah fiahna hautak a ni dawn, kan fixture en hian kan team la naupang tak hi eng ang tak nge kan nih chu a lang dawn.

"European team leh Premier League team ṭha lakah hian kan nihna chu fiahin a awm ṭhin. A pawimawh ber chu khawvel hmuhah hian kan team khelh dan phung nghet leh ṭha taka kan lanchhuah tir theih hi a ni," tiin a sawi a, an hmelma lakah chak ngei a inring.