Ashworth-a'n Newcastle khing dawn

Manchester United-in sporting director atan Dan Ashworth an duh a, English pachal hi Newcastle United-ah sporting director-ah hna a thawk mek. Magpies hian Ashworth hi chhuah an phal lo a, zângnadawmna pound maktaduai 20 an phut.

Man United lam hian zângnadawmna pek ai chuan Ashworth rawih loh mai an thlang a, hei vang hian kum 53 mi Ashworth chungchangah club pahnihin inremna an la nei lo.

Ashworth chuan Old Trafford a pan theih nan thuneitu sang zawka zualko a tum a, Newcastle erawh an dinna ngaiah an la ding reng thung. Kum 2022 khan Ashworth hian Newcastle hi a zawm a, hemi hma hian West Bromwich Albion tan a thawk. Man United neitu thar Ineos head of sport Sir Dave Brailsford leh Ashworth te hi an inhre ṭha viau bawk.

Ineos hnuaiah Man United indinthar an tum mek a, khelmual pawn lamah an insiamrem mek. Khelmual chhung lamah pawh Man United hian result ṭha an mamawh. Zanin dar 7:30 hian Man United-in Burnley an mikhual ang.