Hlimen chungah Durtlang North

Ather Pro Volleyball League 2024 khelh laiah Durtlang North chuan Hlimen chu 28-26, 28-26, 22-25, 25-18 (3-1) in an hneh a, tun season PVL an match hmasa berah hnena nen bul an ṭan.

April 25, Ningani zan LPS Arena, Falkland Venga inkhelah Durtlang North tan Shashank Kandpal a inlan a, Uttarakhand aṭanga an chah luh hian a match hmasa berah point 29 hlap chhuak nghalin a team a chak pui, a phu ang ngeiin Kuriz Player of the Match atan thlan a ni.

Durtlang North hian champion lai ni chungin nikumah vawi nga an khel a, chak nei miah loin league round paltlang zo loin an tla. An player langsar Fabian Lallunghnema, Vanlalṭanpuia leh Vanlalmawia te an chhuak a, Mizo player hriat hlawh tham an neih belh lo.

Mahse, Uttarakhand aṭangin Shashank an la lut a, ani hian danglamnaa siam. Short ball vawtu Thangminlal Guite chuan point 17 neiin, ani bakah hian Khawbel tlangval Johan Vanneihsanga'n ṭum 16 vaw tlain vawi sarih ve ve an tisual thung.

Hlimen lamin Pro Volleyball-a an tel hmasak berah Mizo hlangin an khel nghal a. Set hmasa pahnih la zawn thei turin lehlam aiin hun ṭha an nei hmasa ve ve a; mahse, inelna sanga tawn hriat tlachham an player-ten an su tlang zo lo.

Hlimenin player langsar an kawl lo a, thawh hona ṭha hmachhuanin Durtlang North nen set thumna thlengin an inhnehtawk hle. Kai thar tan Joseph Lalbiaksanga'n point 10 thawk chhuakin vawi thum chiah a tisual a, Zolungmuana leh PC Lalnuntluanga'n point 14 ve ve hmuin point kua leh 10 an hloh.

Durtlang North hian May 4, Inrinniah champion lai Thutak Nunpuitu Team an hmachhawn leh dawn. May 7, Thawhlehniah Hlimen hian team ṭha leh TNT hnehtu Hunthar an hmachhawn ve leh thung dawn a ni.

Zanin hian a hmun ngaiah mipa team inkhel pakhat a awm dawn. Team ṭha leh sulhnu nei tam tawh Chhinga Veng Spikers leh Tuichangral an intum dawn a, team an intluktlan hlawm em avangin chak zawk tur pawh sawi thiam a harsa hle.