PSG an champion dawn?

Paris Saint Germain chuan zanin dar 12:30 hian Le Havre an mikhual dawn a, an chak a nih chuan midang result ngaihchan tel ngai loin Parc des Princes-ah ngei mai Ligue 1 champion an lawm thei ang.

Paris club hian season bul an ṭan fuh tawk lo a, mahse coach Luis Enrique-a'n an khelh dan phung a siam ngheh hnuah erawh hnung lam an hawi tawh lo, league match 11 an khelh tlin aṭanga tun thlengin a chung berah an awm.

Tun season Ligue 1 match 30 an khelh tawh aṭangin PSG hian point 69 an hmu a, anmahni hnaih bertu AS Monaco aiin point 11 in an sang zawk, khelh hmabak match pali chauh an nei tawh a ni.

PSG boruak tluk zetin an forward Kylian Mbappe chanchinin sawi a hlawh ṭhin. Season tawp ruala contract hmang zo tur hian pawh sei tumna a nei rih lo a, hei vang hian a hma hun zawhna a tam thei hle.

France captain hi Real Madrid nen sawizawm a ni a, hetih lai hian Enrique chuan chelh theih a la inbeisei thung a, chelh tur erawh chuan nomawi chawi theih zawng zawng an chawi a ngaih a rin thu a sawi bawk.

Mbappe tak hian a hma hun hi chiang takin a la sawi lo, khawthlang chanchinbu mite sawi bak chu puan chian a la awm lo, hei vang hian nipui bazar tingaihnawmtu chu a ni leh ngei dawn.

PSG hian tun season chhungin France Super Cup an chawi tawh a, an ban phak maiah Ligie 1 title a awm. French Cup final lut tawhin Champions League semifinal an lut tawh bawk - ropui taka season khar turin an dinhmun a ṭha hle.