Madrid Open-ah Nadal a chak phawt

Rafael Nadal chuan Ningani zan khan Madrid Open 2024 atana a match hmasa ber a khel a, harsa lutuk loin a khingpui Darwin Blanch hnehin second round a inhlangkai.

Vawi nga a champion tawhna hmunah Nadal hi a mikhual lo, darkar khat leh minute thum chhung lekin American rawlthar hi 6-1, 6-0 in a hneh - kum 16 mi Blanch tan Nadal-a damkawr pawh a la ṭha mah mah.

Kum 37 mi Nadal hi hliam vangin a buai rei ta hle a, inkhel ve leh zauh ṭhin mah se ngai a awh hleithei lo. Tun hnai khan a dam ṭha a nih ngawt loh chuan French Open pawh a khelh loh tur thu a lo sawi hial tawh a ni.

Madrid Open hma hian Barcelona Open-ah Nadal hi a inlan a, a thleng thui lo. Clay court inelna lian French Open khelh hmain Madrid bakah Rome Open an la hmabak bawk.

Grand Slam vawi 22 champion tawh Nadal chuan, "Madrid-ah hi chuan min thlawptu an ṭha ṭhin a, tunah pawh an la ṭha reng. Heng mite hmaa inkhelh hi chu engtik lai pawhin a nuam takzet ṭhin.

"Rilru no leh mahni inkhawngaih hun a ni lo a, engtiang chena thui leh rei nge ka kal theih dawn tih chu a pawimawh lai zawk chu a ni, ka taksa dinhmun ka ngaichang tel zel ang," tiin a sawi.

Mipa inelna lamah Nadal boruak a lian a, hmeichhe lamah pawh world number 1 Iga Swiatek a inlan avangin thawm a ring. Polish nula hian Chinese nula Wang Xiyu chu 6-1, 6-4 a hnehin third round a lut.

Inkhel dangah Coco Gauff chuan thil mak a thlen tir - American star hian Dutch player Arantxa Rus lakah game a hloh miah lo - 6-0, 6-0 in a chak. Madrid Open-ah hetiang result hi a awm vawi khatna a ni hial.

Maria Sakkari pawhin Donna Vekic chu 6-3, 6-2 in a hneh a, hetih lai hian Grand Slam vawi li champion tawh Naomi Osaka erawh a chak nawn thei lo, a khingpui Russian mi Liudmila Samsonova lakah 6-2, 4-6, 7-5 in a chak lo a ni.